Lyon-in Godfrey an duh

French club Lyon chuan Everton defender Ben Godfrey lakluh duhin Merseyside club hi an dawr a, a man atan pound maktaduai 12.7 an inseng huam.

Godfrey hian kum 2020 khan Norwich City aṭangin Everton hi £25mtd-in a zawm a, match 93 inlansak tawhin, season hmasa khan match 16 chiah a khel thung.

Kum 26 mi defender hian thla 12 bak Toffees-ah hian contract a nei tawh lo a, a man a sang lutuk thei lo. Ligue 1 club lar bakah hian season hmasaa Europa League champion Atalanta chuan an duh bawk.

Serie A club hian January-ah pawh khan Godfrey hi lakluh tumin an lo dawr tawh a, a man atan £10mtd theh chhuak mah se, an inbiakna a hlawhtling zui lo.