Brazil tan goal khung a ngai

Goal khung thiam leh thei tak ni ṭhin Brazil tlarhma a bil rih a, coach Dorival Junior chuan an harsatna hi an siamṭhat nghal tur thu a sawi - Inrinni zinga Paraguay an hmachhawn hunah an insiamṭha em, tih chu fiah a ni ang.

Brazil hian Costa Rica lakah goal an khung thei lo a, 0-0 a an inhnehtawk avangin sawisel an hlawh. Vinicius Junior, Rodrygo leh Lucas Paqueta ten hun ṭha an khawhral a, an insiamṭha thei a nih erawh chuan team hlauhawm berte zinga mi an ni thei dawn.

Real Madrid forward Vinicius chuan, "Brazil tana khelmual ka luh hian mawhphurhna sang tak ka koah a tla tih ka hria, kan khingpui ten min veng deuh bik a nih pawhin tal chhuah theih dan ka ngaihtuah a ngai tihna a ni ang.

"Amaherawhchu, thil engkim mai hi thawklehkhata tih danglam vek theih a ni ngai lo a, chuvangin min ṭantute lam pawhin dawhthei takin min nghak ve se ka duh," a ti a, mipui lam aṭanga nawrna nasa lutuk chuan a ṭha lo zawngin boruak a siam danglam thei tih a sawi.

Costa Rica lakah bench aṭangin Endrick luhtir a ni a, kum 17 mi hian goal khung lo mah se a hmuhnawm - Paraguay an hmachhawn hunah chuan khelmualah hun tam deuh zawk a hman tawh a rinawm.