Kum hnih chhung khel lo tur Sharapova

International Tennis Federation chuan Maria Sharapova chu damdawi hman phal loh a hman avangin kum hnih chhung inkhel thei lo turin an hrem dawn. Russian star hian an hremna chu a tawrh thiam loh thu leh a khin let thur thu a sawi.

Grand Slam vawi nga champion tawh Sharapova hi kumin Australian Open-ah khan damdawi hman phal loh meldonium a hmang tih hmuh chhuah a ni a, March thla aṭang khan inkhel thei lo tura hrem lailawk a lo ni tawh.

Tun hma chuan World Anti-Doping Agency (WADA) hian lung (heart) damdawi atana an hman ṭhin meldonium hi infiammite hman phal loh zingah an telh ngai lo a, kumin January 1 aṭang chuah khan hman phal loh zingah an telh. Kum 29-a upa Sharapova hian a hriselna vawn ṭhat nan tun hma lamin he damdawi hi kum 10 chhung a lo hmang tawh a ni.

WADA chuan scientist-te pawhin meldonium damdawi hi engtiang chiaha rei nge mihring taksah a cham theih tih an lo hre bik lo niin an sawi. January 1 hnulama he damdawi hi an hmang a nih lem loh chuan, March 1 china infiammi taksa endikah he damdawi hi an hmu a nih chuan ngaihhnathiam theih tur ang pawhin ruahmanna an lo siam chhin tawh. Hetiang a nih avang hian Russia chuan Olympic khel tur tennis team-ah Sharapova hi an lo telh hial.

Khawvel puma infiamna kawng hrang hranga thubuai remna sang ber Court of Arbitration for Sport (Cas)-ah a zualko tur thu sawiin Saharapova chuan, "Ka chunga thil thleng hi ka hrethiam thei lo a, thutlukna pawm harsa tak a nih avangin a hma thei ang bera ka inkhelh leh theih nan hma ka la ang," tiin a sawi.

Sharapova hian kum 17 mi chauh a nih laiin Russian tennis player zinga a hmasa ber ni turin 2004 Wimbledon nomawi a chawi a, US Open (2006) leh Australian Open (2008)-ah a champion hnu kum 2012 khan French Open-ah a champion leh a, Grand Slam palia a champion kimna chiah a ni bawk.

Kum 2014 khan French Open-ah hian a champion leh a, hremna hi an hnuk kir emaw an ti nep a nih loh chuan vawi hnih a lo champion tawhna Paris-ah hian kum 2018-ah a inlan ve leh thei dawn chauh, hetih hunah chuan Sharapova hi kum 31-a upa a lo ni tawh ang.

Sharapova hi tun hnai kum 11 chungin khawvel hmeichhe infiammi zinga sum hailut hnem ber a ni char char a, mahse a hming hliau tak avang hian tun hnaiah a sum lakluh tla hniamin world number 1 Serena Williams chuan a rawn khum rih.

American infiamna thawm-hnaw siamtu lian leh lar Nike chuan kumin January thla khan Sharapova nena an inzawmna an lo chhu chat lailawk tawh a, mahse Sharapova-i'n a thubuai a khin let lehna thu a zirin inrem leh thei dinhmunah an ding leh tawh.

London 2012 Olympic silver medallist chuan inkhel loa awm hrehawm a tih thu sawiin, "Tennis khelh leh hlan ka nghakhlel em em a, min
ṭantu ka fan-te ka ngai a ni. Harsatna ka tawh lai pawha min phatsan ve lotu fan rinawmte vangin hun hrehawm pawh ka tawrh theih phah," tiin a sawi.

World number 1 hlui Caro-line Wozniacki chuan pawi a tih thu sawiin,"Tennis hi damdawi hman phal loh chungchangah hian a khauh hle a, hei hi tun thlenga he infiamna ala thianghlim chhan pawh a ni. Maria chauh a ni lo a, infiammi ten hetiang dinhmun an tawng hi chu a lungngaihthlak thei hle a ni," tiin a sawi.