Chile tan point hloh a thiang lo

Copa America cham-pion lai Chile tan Group D aṭanga quarterfinal lut turin Inrinni zing dar 5:30-a an hmachhawn tur Panama lakah point hloh a thiang tawh lo.

Chile hian Arturo Vidal leh Alexis Sanchez te nei mah se an match hmasa berah Angel di Maria leh Ever Banega an ngam loh avangin Argentina lakah 2-1 in an tlawm a, an khingpui tur Panama hian Bolivia 2-1 in an lo hneh tawh thung. Bayern Munich midfielder leh Arsenal forward te hian Europe lama an thiamna ang kha an ram tan an tihlan a ṭul tak zet a ni.

Zing dar 7:30-ah Argen-tina chuan Bolivia an lo hmachhawn ve dawn bawk a, Gerardo Martino naute hian point khat chauh pawh an hmuh belh thei a nih chuan quarterfinal lut turin an dinhmun a ṭha tawh dawn.

Khawvela hmatawng nei ṭha ber pawla ngaih Argentina hian an match hmasa berah Lionel Messi chu hliam vangin an chhawr rih lo a, Barcelona thiampuipa hian training a neih theih tawh avangin khelmual chhungah a hmel a inlan mai thei. Mahse, Gonzalo Higuain bakah Manchester City star Sergio Aguero an la neih cheu avangin Messi hi an la dim deuh a nih pawhin a mak lo ang.