Sum lalut hnem Cristiano Ronaldo

Forbes chuan kum tin a lo tih ṭhin tawh angin kum 2015-16 chhunga infiammi zinga sum la lut hnem ber an puang a, dollar maktaduai 88 la luttu Cristiano Ronaldo aia sum la lut hnem an awm lo.

Real Madrid forward hian nikum June aṭanga kumin June thlengin hlawhah dollar maktaduai 56 a la lut a, fakna leh thil dang aṭanga a sum lakluh hi dollar maktaduai 32 a ni bawk. Tun hi kum 2000 hnua boxer Floyd Mayweather emaw golfer Tiger Woods-ten pakhatna dinhmun an luah loh vawi khatna a ni.

Khelmual chhunga Ronaldo elpui Lionel Messi chu Portugal captain hnaih bertu a ni a, Barcelona thiampuipa hian kum khat chhungin dollar maktaduai 81.4 a la lut. Pathumnaah nikuma parukna dinhmun luahtu NBA star LeBron James a lang a, dollar maktaduai 77.2 a la lut.

LeBron James-a sum lakluh tisangtu erawh Ronaldo leh Messi ang lo takin sponsorship lamah a ni a, Cleveland Cavaliers forward hian kum khatah basketball aṭangin hlawh dollar maktaduai 23.2 a la lut a, fakna leh thil dang aṭanga a lakluh zat hi dollar maktaduai 54 a ni.

Tennis player zingah chuai lam pan tawh angin Roger Federer lang mah se sum lakluh lamah erawh a chuai hleithei lo. Swiss pachal hi tennis player zinga sum la lut hnem ber niin dollar maktaduai 67.8 a la lut a, palina dinhmun a luah.

Basketball-in top ten-ah player pathum thawhin an thawh hnem ber a, LeBron James bakah pangana nichunga dollar maktaduai 56.2 la luttu Kevin Durant leh dollar maktaduai 50 la luta sawmna dinhmun luahtu Kobe Bryant-te an lang.

Top 100-ah baseball-in player an thawh hnem ber a, top 10-a lang phak player nei lo mah se player 100 zingah erawh 26 an thawh a, American football chuan top 100-ah player 21 an thawh bawk.

Sum la lut hnem top 10

1 Cristiano Ronaldo $88m

2 Lionel Messi $81.4m

3 LeBron James $77.2m

4 Roger Federer $67.8m

5 Kevin Durant $56.2m

6 Novak Djokovic $55.8m

7 Cam Newton $53.1m

8 Phil Mickelson $52.9m

9 Jordan Spieth $52.8m

10 Kobe Bryant $50m