Portugal chak zanah Ronaldo bawk

Euro 2016 khel tura inbuatsaih Portugal chuan Nilaini zan khan Estonia 7-0 in an sawp a, captain Cristiano Ronaldo chuan an ram innghahna a nihzia pholang nawnin goal hnih a khung.

Portugal tan second half-a coach Fernando Santos-a'n a lak chhuah Ronaldo (36' & 45') bakah hian Ricardo Quaresma (39' & 77') chuan goal hnih khungin assist vawi khat a nei bawk a, upat tawh lamah kum 32-a upa Quaresma a vul thar leh.

Players pahnihin an thiam thil an pholan karah Portugal tan Danilo Pereira (55') leh Eder (80') ten goal khat ve ve an thawh bawk a, Estonia defensive midfielder Karol Mets chuan an mualpho belhchhah turin an lamah goal khat a ti lut bawk.

Inkhelh zawhah Ro-naldo chuan, "Game ṭha tak kan khel a, goal sa-rih lai kan khung theih avangin inchhuang tur kan ni. Mahse, zanina kan chakna hi friendly match chauh a ni a, kan hnehna chan hian awmzia a nei thui lo. Tun aia hnunga kan tawlh a thiang tawh lo. Real Madrid tan Champions League nomawi ka chawi tawh a, Euro-ah ka ram hi nomawi chawipui ka duh a ni," tiin France-ah champion a duh thu a sawi.

Portugal hian Euro 2016-a an match hmasa ber chu June 14 zanah an khel dawn a, Iceland nen an inhmachhawn ang.