Sheffield United neitu ten Kerala-ah club lei

Premier League club Sheffield United enkawltu leh neitu United World Group chuan football hmanga an sumdawnna huang zauh zel an tum a, Kerala club Quartz FC an lei. 

UWG hian club hming hi FC Kerala United tiin an thlak nghal a, inleina chungchang hi official taka puanzar ni lo mah se lehkha tihfel ngai ang chu an tifel zo tawh a ni. 

United World Group hian Quartz FC an lei tak avangin an hnuaiah club pali an awm tawh tihna a ni. Sheffield United bakah hian Belgian Pro League club K Beerschot VA leh UAE second division club Al Hilal United an nei. 

UWG hian hmathlir thui tak an nei nia sawi a ni a, club hmunpui Kozhikode bakah India ram hmun hrang hranga academy leh grassroot project kalpui an tum - hei hi Al Hilal lamah pawh an hlawhtlinpui hle. 

Sheffield United neitu te hian Kerala ram chhunga Malappuram-ah club lei an tum zet a, mahse a tawpah  Kozhikode District Football Association (KDFA) secretary P Haridas-a club Quartz FC lei hi an thlang ta a ni. 

FC Kerala United hian season tharah Kerala Premier League leh  I-League 2nd Division an khel dawn a, ISL khelh tumin hmachhawp an nei dawn niin an sawi. 

Indian Super League-ah Kerala Blasters an awm mek a, I League lamah Gokulam Kerala an nei bawk.