NBA Finals, Game 3 James leh Cleveland an tho chhuak

'Thih leh dam kara leng kan ni' - tiin LeBron James chuan NBA Finals Game 3 an khelh hmain a sawi. James leh a team Cleveland Cavaliers chuan Golden State Warriors lakah 120-90 a hnehna changin champion beiseina an nei thar ve leh ta.

Ningani zing khan Quicken Loans Arena-ah mipui 20,562 rualte chu "Cleveland...Cleve-land...Cleveland..." tiin an au rual dual dual a, an duh leh mamawh an au chhuak chiang hle. Golden State hian an match hmasa pahnihah hnehna an chan tawh avangin best of seven series-ah 2-1 in hma an la hruai a, Inrinni zing dar 6:30-ah Game 4 an khel leh ang.

Cleveland thiampuipa Le-Bron James-a'n inngahna tham a la nihzia a pholang nawn a, point 32 a score bakah rebound vawi 11 lain assists ṭum ruk a nei bawk. American power forward bakah hian Kyrie Irving chuan point 30 score-in assists vawi riat a nei bawk a, an chakna hnar an ni. Player pawimawh ni ṭhin Kevin Love erawh an match hnuhnung bera hliam a tawrh avangin a inlan thei lo thung.

"Hlawhtling tur chuan i chak lohna lai i pawm ngam a ngai
ṭhin" tih thu lo sawi tawhtu James hian a team tan beisena a siam thar leh chiang hle. NBA Most Valuable Player atana ṭum li an lo thlang tawh hi a phu e.

Golden State ṭum fuh loh ni a ni dawn tih inkhel ṭan tirh
aṭangin a lang nghal. Inkhel bul ṭan aṭanga minute nga chhung lekah Cavs hian 19-4 in hma an hruai fal nghal nalh. NBA Most Valuable Pla-yer Stephen Curry chuan beisei angin a la khel chhuak lo chhunzawm zel a, first quarter-ah minute 10 a khelh chhungin point a score miah loh bakah ṭum hnih foul a nei a, Klay Thompson chu hliam vanga lakchhuah a ngaih bawk avangin GSW an talbuai tak zet.

Second quarter-ah Warriors hi insiam ṭhain point 27 score mah se second half lam erawh Cleveland chan a nih chhun zawm leh a, inkhel a tawp meuh chuan an khelmual hman thiama inkhel an ni bawka point 30 ngawtin an sang fal ta a ni.

Champion lai GSW hi chak lo mah se an chhe ta duai tih-na a ni lo a, champion tura ring-tu pawh an la tam zawk. Kum 28-a upa Curry hian 2016 NBA Finals game thum an khelh tawha a point score belhkhawm chu 48 chauh a la ni a, regular season-a kan hmuh Curry ang kha chu a la ni rih lo. Mahse, American point guard hian playoff khelh laiin hliam a nei tih kan hriat a
ṭul a, player ṭha ber a nihna hmun basketball court-ah a thiam zia a la phochhuak leh ngei ang.

Kum 31-a upa James chuan, "A tawpah chuan kan theihna tak kan lanchhuah tir leh ta. Min ṭantute vang a ni a, team thawhhona ṭha a awm chuan kan duh leh beisei kan thleng ṭhin," tiin match hnih an chak loh zawn hnua hnehna an chan ve leh tak chungchang a sawi.

Warriors coach Steve Kerr chuan, "Inkhel bul ṭan aṭangin Cavs khan an duh danin min pawt phar a ni ber a, kan inrem khawm fuh tawk loh bakah kan nem hle a ni. Tihsual kan ngah tih a chiang a, an tan kawng kan hawn sak zau lutuk," tiin a naute khelh danah a lungawi lo hle.