Daniel Agger a chawl ta

Kum 31 leka upa ni mah se Daniel Agger chuan inkhelh a chawlhsan thu a puang. Liverpool defender hlui hian kum 2014 khan Reds chhuahsanin a chawr chhuahna Brondby a pan a, Denmark club aṭang hian inkhelh a chawlhsan ta a ni.

Liverpool-a kum riat a cham chhunga fan-te lawm hlawh ber pawl ni hman defender chuan, "In mi ṭawiawmna avangin ka lawm a, tawnhriat ropui tak nei chungin football chu ka chawlhsan dawn ta. Thutlukna siam harsa tak ni mah se ka tawp hun tur dik takah ka tawp a, ka career kha ka thlirletin ka chhuang takzet a ni," tiin football khawvel a mangṭha.

Demark tan vawi 75 a inlana goal 12 khungtu defender hian kum 2005 khan Brondby aṭangin Liverpool a zawm a, Reds tan a season hnihna
aṭangin player pawimawh pawl a ni chho nghal. Defender beiseiawm tak ni mah se hliamin a tihbuai fo avangin a nih tur ang a ni phak lo a, Anfield-a a cham chhungin League Cup bak nomawi liantham chawi sawi tur a nei lo.

Ṭum hnih lai Danish Football Player of the Year lo ni tawh hi a huai-sen leh thawhrim vangin Kop zingah a tlatlum hle a, Merseyside club tana season riat a khelh chhungin match 232 inlanin goal 14 a khung. Season hman zawh takah khan Brondby tan Superliga-ah match 24 a inlan a, Liverpool a zawm hmain Danish club hi league leh Danish Cup-ah a lo champion pui tawh.