Copa America Centenario Brazil hmaah Haiti an hawihai; Coutinho a vul

Ecuador laka goal khung thei lo Brazil-in goal khung an harsat lohzia an pholang - Nimin zing khan Dunga-a naute hian Haiti chu 7-1 in an sawp a, hattrick siamtu Liverpool midfielder Philippe Coutinho chu khelmual chhunga player langsar ber a ni.

Group B inkhel dangah an match hmasa bera Haiti hnehtu Peru leh Ecuador an inhmachhawn bawk a, goal hnih ve ve khunga inhnehtawkin group B aṭanga quarterfinal lut turin Brazil, Peru leh Ecuador-ten beiseina an la nei vek.

Goal a sur!

Camping World Stadium, Orlando-a inkhelah Brazil-in an chungnun zia inkhelh ṭantir aṭangin an lantir nghal a, Coutinho chuan minute 14-naah Brazil tan goal hmahruai a khung der. Haiti-in chak lo tur rilru an pu sa niin a lang a, an thiamnain Brazil a chelh ngang lo tih a lang bawk.

Minute 29-naah Coutinho bawk inlarin a goal hnihna a khung - kum 1999-a Brazilian player ropui Rivaldo-a'n Uruguay lama minute 30 hma lama goal hnih a khung hnua Brazilian player zinga Copa America-a minute 30 tlin hmaa goal hnih khung leh thei hmasa ber a ni. Renato Augusto chuan minute 35-naah khung ve lehin halftime a thlen chuan Brazil-in 3-0 in hma an hruai der tawh.

Second half-ah Haiti-in thawh an tum tih tilangin Brazil tlarhnung chhaih buai zeuh zeuh mah se an tlarhma hriam tawk loh an tuar a, substitute Gabriel chuan minute 59-naah Brazil goal lina a khung.

Lucas Lima-a'n (67') Brazil goal ngana a khung hnu lawkah Haiti tan James Marcelin (70') chuan khung ve bawk mah se goal an chhuah hnem lutuk hret a, a team-te chawk phur turin a tawk zo lo - Renato Augusto (86') leh Coutinho (90'+2) ten Brazil tan an khung leh a, ropui takin hnehna an chang.

Coutinho faktu Dunga

Nimin zinga goal thum a khung hmain Coutinho-a'n Brazil tan match 14 a khelhah goal khat chiah a la khung a, Liverpool-a a thiamna ang ram tan a la lanchhuah tir tawk lo.

Brazil coach Dunga chuan, "Coutinho-a'n a hun ṭha neih a chhawr ṭangkai thei hi ka lawm hle a ni. Match kan khelh leh practice kan neih apiangin nimin ai khan hma a sawn zawk zel a ni. Liverpool-a Coutinho ang kha ka duh thu ka hrilh a, Liverpool Coutinho chuan game a chhiar thiam a, a team tan hmahruaitu niin risk lak a hlau ngai lo," tiin a player chu club tana a khelh dana a khelh phawt chuan player hlauhawm a nih thu a sawi.

Peru an zuih

An match hmasa bera Brazil nena inhnehtawk Ecuador-in beiseina sang tak nen inkhel bul ṭan mah se inkhel ṭan tir lama Peru goal rang tak pahnih vangin an talbuai teuh hman hle - mah se a tawpah Peru an zuih a, Ecuador an vannei.

University of Phoenix Sta-dium-a inkhelah Peru-in minute 5-na lekah goal hmahruai an khung nghal a, goal khungtu hi Sao Paulo winger thar Christian Cueva a ni. Peru an phur laklawh a, minute 13-naah Edison Flores hmangin an goal hnihna an khung.

Goal hnih an chhuah hnuah Ecuador an harh zawk a, Peru an thamral zui nghal bawk. Minute 39-naah Enner Valencia chuan Ecuador phur-rit chhawk zangkhai turin si khat a sut a, goal dang lut loin chawlhlawk hman a ni.

Ecuador-in chawlhlawk an hmang ṭha zawk. Second half ṭan aṭanga minute 3-na lekah Miller Bolanos chuan Ecuador tan an goal hnihna a khung a, si phurh a sut zo. Team pahnihin goal dang an khung thei tawh lo a, injury time-ah Ecuador defender Gabriel Achilier chu yellow card pahnihna hmuh vangin hnawhchhuah a ni bawk.