Roger Federer a lo kir e

Grand Slam vawi 17 champion tawh Roger Federer chu grass court-ah a inlan leh thei ta. Ni-laini khan Taylor Fritz nen Mercedes Cup second round-ah an inhma-chhawn a, ruah sur vangin an inkhel zo hman lo.

Hnungzângna vanga French Open khel lo Federer hian minute 20 an inkhelh chhungin 4-3 in hma a hruai mek a, harsatna dang a thleng leh a nih loh chuan nizan khan inkhelh chhunzawm tura ruahman a ni.

Swiss thiampuipa Federer leh world number 4 hlui Juan Martin del Potro te chu an hliam dam tawhin inkhel ve leh thei tawh mah se Rafael Nadal erawh ban rek na vangin a la inkhel thei lo thung.

World number 4 Nadal hi a hliam vangin vawi kua a lo champion tawhna French Open aṭangin a inhnuhdawh a ngaih phah a, Wimbledon atan pawh a dinhmun a chiang ta lo.

Nadal-a patea leh a coach ni bawk Toni Nadal chuan, "Nadal hi enkawl mek niin a lo kir hun tur hi kan la sawi chiang thei lo a, 100%-a a dam chian hma chu a inkhel lo ang," tiin hliam dam fel lo chunga inkhelh luih tir a tum lo.

Beijing Olympic cham-pion Nadal hi hliam vangin a buai ngun ta hle a, 2012 London Olympic-ah pawh khan hliam vangin a lo inlan thei lo tawh bawk.