Wenger-a'n hmun ṭha min tiam - Xhaka

Premier League pahnihna Arsenal player thar Granit Xhaka chuan North London club a zawm chhan chu manager Arsene Wenger-a'n hmun pawimawh chan tir a tiam vang a nih thu a sawi.

Sum hmang hreh ṭhin Wenger-a'n Bundesliga club Borussia Mon-chengladbach aṭanga cheng tam tak sengin kum 23-a upa Xhaka a la lut a, player man to dang pawh a la lut leh ngei dawn niin a lang.

Switzerland international chuan Gunners a zawm chhan sawiin, "Ka tan chuan Wenger hi legend a ni a, a ni reng fo ang. Phone aṭangin min lakluh a duh thu sawiin Arsenal tana khel tura min duh thu leh football khelh nuam ka ti takzet a nih chuan Emirates Stadium chu football vanram ang mai a nih thu min hrilh," tiin a sawi.

Euro 2016 khel tur Xhakha chuan sawi chhunzawmin, "France-a inkhel tura kan kal hmaa Arsenal ka zawm fel hman hi ka lawm hle. Tunah chuan thildang ngaihtuah buai miah loin European Championship chauh ka ngaihtuah theih phah. Hun rei vak lo chhunga thil engkim kan ti fel hman kha a lawmawm hle," tiin a sawi.