De Gea leh Casillas dinhmun chiang lo

Champion lai Spain hi European Championship nomawi chawi tura rinkaite zingami ni mah se coach Vicente del Bosque chuan David de Gea nge Iker Casillas chungah rinna a ngah ngam zawk dawn tih a la chiang lo.

Kum 25-a upa De Gea hi tun-lai keeper ṭha ber pawl a ni a, Manchester United best player nilai a nih bakah a vawi thum nan PFA Team of the Year atan thlan tel a ni bawk. United keeper hian season liam ta khan league-ah clean sheet vawi 15 zet a nei a, a tluk loh awmchhun chu Arsenal keeper Petr Cech chiah a ni.

Hetihlai hian kum 35-a upa Casillas erawh beisei angin tun hnaiah a khel chhuak lo. Real Madrid-a hmun a chan loh hnuah Porto panin Portuguese club tan pawh beisei angin a khel ṭha chuang lo. Mahse, Euro 2008 leh 2012 bakah 2010 World Cup champion puitu a nih tawhna hian a buk a la ti rit niin a lang.

Spain hian Euro 2016 inbuatsaihna hnuhnung ber atan Thawhlehni zan khan Georgia an hmachhawn a, hemi ṭum hian De Gea-a'n goal a veng. Tournament lian ṭan dawnah Del Bosque-a'n a thlan miau avangin France-ah pawh inkhel bul ṭantu ni tura ngaih a ni. Mahse, United keeper hian goal a chhuah avangin 1-0 in an chak lo a, FIFA ranking-a 137-na lakah Spain an tlawm!

Hmun a chan tur leh chan loh tur a chian loh thu sawiin De Gea chuan, "June 13 khian eng nge lo thleng tur chu a chiang dawn chauh a, tunah chuan coach-in ti tura min tih anga khel turin ka inpeih e. Khelmual chhunga ka lut a nih chuan ka ṭhiante tan engtiangin nge ka ṭangkai theih ang tih leh ka khelh ṭhat theih dan tur chauh ka ngaihtuah ṭhin. Tu nge inkhel bulṭan zawk dawn tihah inhnialna a awm fo a, a pawimawh ber erawh ṭha taka khelh a ni," tiin a sawi.

Spain hian kumin Euro-a an match hmasa ber chu Thawhṭanni zan dar 6:30 hian an khel ve chauh dawn a, Czech Republic nen an inhmachhawn ang.