Hmalam hun chiang lo Christian Benteke

Liverpool striker Christian Benteke chuan season thara manager Jurgen Klopp-a ruahmannaa a tel lo a nih chuan Anfield-a cham chhunzawm zelin a tan awmzia a neih loh tur thu a sawi.

Kum 25-a upa Ben-teke hi season hmasa ṭan dawn khan khatih laia Reds manager Brendan Rodgers chuan pound maktaduai 32.5-in a la lut a, mah se October thlaa Klopp-a'n Liverpool a enkawl hnuah Merseyside club tan league match riatah chiah inkhel bul a ṭan.

Aston Villa striker hlui chuan, "Liverpool-ah contract ka la nei a, coach ruahmannaah ka la tel ve a nih phawt chuan cham chhunzawm zel ka duh. Mahse, coach berin min duh lo a nih erawh chuan ka tan cham chhunzawm zel ṭulna a awm lo," a ti.

Euro 2016 khel tura inbuatsaih mek Belgium striker chuan sawi chhunzawmin, "Klopp-a'n Liverpool a zawm tirh khan a ruahmannaah ka tel lo tih ka hre nghal. Aston Villa tan ka khelh laia Borussia Dortmund lama min lakluh tum coach tho kha a ni a, a ruahmannaa ka tel lo kha ka tan chuan pawm thiam a harsa a ni," tiin German coach chungchang a sawi.

Hetihrual hian Ben-teke chuan Euro-ah rilru pek rih phawt a duh thu sawi nghalin, "Klopp nen hian vawi tam kan titi dun a, a thutlukna apiang chu ka zahin ka pawm vek a ni. Mahse, tunah erawh Euro lama rilru pek phawt ka duh avangin inelna kan khelh zawh hnuah ka inngaihtuah leh ang," tiin Merseyside club hi chhuahsan a hreh loh hmel hle.