Hammers-in Dawson an lalut

Premier League club West Ham chuan Watford defender Craig Dawson chu season khat chhung an hnena khel turin loan-in an lalut a, a contract hun a zawhah hian an duh chuan a nghetin an lalut zui thei ang. 

West Ham hian nipui transfer laiin centre back lakluh tur an melh nasa a, mahse David Moyes-a'n a lakluh tumte a lalut thei lo - Burnley defender James Tarkowski lak a tumna chu a hlawhtling lo a, Chelsea aṭangin Fikayo Tomori chu loan a lakluh tum mah se Tomori hian loan a chhuah a duh lo bawk. 

Dawson hian season hmasa khan Hornets (Watford sawina) tan league match 29 a khel a, mahse a team hi chhanhim zo loin division hniam lamah an tla. Season hmasa ṭan dawna Watford a pan hma hian West Brom-ah kum kua zet hun a hmang hman. 

Hammers boss David Moyes chuan, "Kan tlarhnung thuam ṭhat kan tumna hi chu a rei tawh a, nakin hun atan mai ni lo tun hun atan pawh kan mamawh a ni. Loan a Craig kan lakluh hian kan hun tawn mekah kan squad a tichhah dawn a ni," a ti.

Watford hian khup hliam vanga November hnua la inlan leh lo Daryl Janmaat chu free transfer-in an chhuahtir a, Dutch full back  hian Watford a kum li hun a hman chhungin match 85 a khelhsak hman - goal ruk a khung bawk.