Euro 2016 kan nghak chhuak ta France Vs Romania

Europe ramte tana football inelna sang ber European Championships 2016 hawnna chu Stade de France-ah neih a ni dawn a, inelna thlengtu France leh Romania ten zanin dar 12:30-ah match hmasa ber an khel ang. Inkhel hi Sony ESPN-ah pekchhuah a ni ang.

France hian kum 1984 khan European Championship an thleng a, Michel Platini kaihhruaina hnuaiah inelna lian thamah a vawi khat nan an champion. July 12, 1998 khan opening match khelhna tur stadium-ah France-in Brazil an hneh a, a vawi khat nan FIFA World Cup-ah an champion. Khami ṭuma Les Bleus captain Didier Deschamps kha kum 18 hnuah coach a ni tawh a, a enkawl France hi Romania aiin an chak a rinawm zawk a, Euro 2016 nomawi chawi tura rinkai an ni pha bawk.

Romania chu

Anghel Iordanescu kaih-hruai Romania hian Euro 2016 khel turin qualifying-ah hneh loh tawng lo mah se vawi nga chiah chakin vawi nga an in-draw a, dah san an harsa hle. Romania hi qualifier-ah Group F-ah pahnihna an ni a, an tluk loh chu football thiam ram tiha sawi tur ni lo Northern Ireland an ni.

Romania hian qualifier an paltlang hnuah friendly match vawi ruk an khel leh tawh - an chak zat leh chak loh zat chu vawi khat a ni. Ukraine lakah an tlawm a, an hneh chhun Georgia erawh 5-1 zeta sawpin Italy, Lithuania, Spain leh DR Congo te nen an inhnehtawk.

Tun hnaia an record thlirin Romania hian chak an harsat tih lang a, chutihrualin chak lo zawka an ṭan ngai meuh loh avangin France hi rinkai ni mah se point an hloh an nih pawhin a mak lo ang.

France ve thung

Inelna thlengtu an nih avang-in France-in qualifier an khel ve lo a, friendly match an khel thung. Kum 2015 chhungin match 10 an khel a; Brazil, Belgium, Albania leh England an hneh lo a, a bak zawng an chak. Kuminah erawh France hian record an nei ṭha - Netherlands, Russia, Cameroon leh Scotland te khelhpuiin an hneh vek.

France tan hian Premier League player an ṭangkai a, kumin chhunga an goal 12 zinga goal 7 hi Olivier Giroud, Dimitri Payet, N'Golo Kante leh Laurent Koscielny te khung a ni.

En bik tlak

Romania hian Euro 2008 an khelh hnuah inelna liana an inlan leh lo a, player lar tihtur pawh an kawl lo.

Captain Vlad Chiriches hi Tottenham Hotspurs-in Au-gust 2013 khan a hunlaia club transfer record ni turin euro maktaduai 9.5 in an la lut a, Premier League match hmasa berah man of the match ni nghal mah se beisei a phak chhunzawm lo. Nikum July thla khan Napoli-in pound maktaduai 4.5 in Romanian defender hi an la lut a, Serie A club tan hian match sarih chiah a inlan.

Romania hian Watford goalkeeper Costel Pantilimon an nei a, an first keeper erawh Fiorentina keeper Ciprian Tatarusanu a ni a, keeper an nei ṭha tih a chiang. Midfielder Gabriel Torje chu chhinchhiah lawk atan a ṭha, Turkish club Osmanlispor midfielder hian ram tan match 50 khel tawhin goal 11 a khung a, ani hi France-a zin zinga Romania tana goal khung tam ber a ni.

France lam erawh player
ṭha an tam lutuk a, koh ve loh Karim Benzema pawh ṭha viau mah se Arsenal forward Giroud-a'n goal a khung zel avangin a hming an lam ri tawh meuh lo. Fiahna hmachhawn tur player chu West Ham player of the year Dimitri Payet leh Leicester City champion puitu Kante te an ni.

France boss Deschamps chuan, "Dimitri Payet-a'n ball a khawih tawh chuan eng emaw a thleng ṭhin. Freekick leh corner-kick a pet thiam a, chu chu a pawimawh a ni," tiin Payet a fak.

Les Bleus rawlthar duhawm Kingsley Coman chu inhliam vanga ni hnih training a chhim loh hnuah Nilaini khan team practice a zawm leh tawh. Ba-yern Munich winger Coman aiah hian Atletico star Antoine Griezmann chu lut tura rin a ni a, Manchester United chhuan-vawr Anthony Martial tan starting eleven-ah hmun a awm kher lo ang.

Ngaihnawm

• Probable XI

France (4-3-3) : Lloris; Sagna, Rami, Koscielny, Evra; Pogba, Kante, Matuidi; Griezmann, Giroud, Payet

Romania (4-2-3-1) : Tatarusanu; Sapunaru, Chiriches, Grigore, Rat; Pintilii, Hoban; Torje, Stanciu, Stancu; Andone

• Romania-in France an hneh hnuhnung ber chu April 1972 daih tawh kha a ni.

• March 1967 khan France ramah a vawi khat nan ram pahnih hi an inkhel a, Romania an chak. Hemi hnu hian khualmualah Romania hian France hi vawi sarih intumah vawi nga an chak lo a, vawi hnih dang hi an inhnehtawk.

• France hian opening match khelhna tur Stade de France-ah hian World Cup leh Confederation Cup match sarih an khel a, vawi ruk chakin vawi khat dang an inhnehtawk.

• Anghel Iordanescu hian inelna lianah Romania hi vawi li a kaihruaina chiah a ni. Kumin hma hian World Cup 1994, Euro 96 leh World Cup 1998 ah te a lo kaihhruai tawh.