Mumang ang mai a ni - Rashford

Marcus Rashford chuan Euro 2016 khel tura koh a ni ve mai chu mumang ang mai a nih thu a sawi.

Kum 18-a upa Rash-ford chuan, "Krismas lai khan rim takin ka thawk a, ka tum chu United Under 21 tana khelh a ni. Tuna ka thlen chin hi a mak lutuk a, thlir let pawh hian awih a harsa a ni," tiin a sawi.

Rashford hian kumin February thla khan United player inhliam tam vangin Louis van Gaal-a'n khelhna hmun a pe a, season a tawp meuh chuan match 18 khelin goal riat a khung. United rawlthar hian FA Cup nomawi a chawi bakah ram tana khel turin koh a ni bawk.

Ram tana khelh chung-chang sawiin Rashford chuan, "United tan khan inkhel pawimawh khelh tur a tam a, kan khelh zut zut bawk avangin England tana khelh hi ka ngaihtuah ngai lo a, club football chauh ka rilruah a awm. England tana ka khelh hmasak ber khan changing room-ah ka lut a, jersey hnunga player hming inziak ka hmuh khan mumang ang mai a ni. Mahse pressure a tam phah ka hlauha vangin ka ngaihtuah thui duh lo," a ti.

United rawlthar hian ram tana a khelh hmasak ber hian Australia lamah minute thumna lekah a khung a, kum 18 leh ni 208 a upa niin England tana khelh hmasak ber
ṭuma goal khung nghal thei naupang ber a ni.

England hi Group C-ah Russia, Wales leh Slovakia te nen an awm a, Roy Hodgson-a chhawr theih turah Wayne Rooney, Harry Kane, Jamie Vardy leh Daniel Sturridge te an awm avangin Rashford tan Euro 2016 a inlan tur chuan vanneih a ngai ang.