Howedes leh Mustafi ringtu Low

Germany-in France rama an training hmasa berah defender Antonio Rudiger chu a inhliam nghal a, AS Roma defen-der aia an koh chu Bayer Leverkusen defender Jonathan Tah a ni.

Die Mannschaft (Germany kohna) coach Joachim Low-a'n defence laiah Jerome Boateng leh Mats Hummels te a hmang ṭhin a, Borussia Dortmund defender Hummels hi match hmasa bera Ukraine an hmachhawn hunah a la dam chian hman hmel loh avangin Rudiger hi starting eleven chang tura rin a ni.

Germany boss Low chuan, "Shkodran Mustafi hian defence laiah tawnhriat a nei a, ani bakah hian Benedikt Howedes hi a laiah chhawr theih a ni. An pahnih chungah hian rinna ka nghat a, Boateng leh Howedes hi Germany U21-ah an khel dun ṭhin," tiin Rudiger tel loa tlarhnung a rem tum dan a sawi.

Kum 24-a upa Mustafi hi Valencia tan a khel a, season liam ta khan inelna hrang hrang match 42-ah a inlan. Kum 28-a upa Howedes hi FIFA World Cup an champion ṭum khan goalkeeper Manuel Neuer leh captain Philipp Lahm te nen minute zawng zawng an khel vek.

Rudiger aia koh Jonathan Tah hi kum 20 leka upa a ni a, season liam ta khan feet ruk leh inches 3.5-a sang defender hian Leverkusen tan match 29-ah a inlan.