Euro 2016 I tana hriat tur pawimawhte

Zanin dar 12:30-ah Euro 2016 khelh ṭan a ni tawh dawn. France ramah Europe ram 24 ten an khawmualpuia football thiam ber nih an inchuh dawn. Ni 30 chhung inelna hi stadium 10-ah neih tur a ni dawn a, July 10-ah Paris khawpuia Stade de France-ah Europe-a inkhelh thiam ber ram a hriat ang.

Engtinnge?

Kum 1996-a England-a Euro nghah a nih aṭang khan ram 16-in Europe-a thiam ber nih an inchuh ṭhin. Kuminah erawh a vawi khat nan team hi 24-ah tih pun a ni a, group parukah (A-F) ṭhen niin group khatah team pali zel an awm.

Group tina a sang pahnihin last 16 an lut ang a, pathumna zinga a ti ṭha zual plaiin an hnung an zui ve bawk ang. Hemi awmzia chu team 24 zinga pariat chiahin last 16 an khel thei dawn lo tihna a ni.

Team thar

European Championship-a team tel thei zat tihpun a nih rualin he inelnaa la inlan ve ngai lo ram ten hun ṭha an neih phah a, kuminah hian Euro-a la inlan ngai lo ram panga kan hmu dawn. Britain huam chhung aṭangin Northern Ireland leh Wales an inlan dawn a, an vawi khat inlanna tur ni mah se an players neih dan enin an inthlahrung lutukin a rinawm loh.

Czechoslovakia hming chawia suihfin an nih laiin Slovakia player-ten Euro lo khel tawh ṭhin mah se ram mal anga an din hran hnuah tun hi Euro an khelh hmasak ber tur a ni. Liverpool defender Martin Skrtel hoin an khel ang. Albania tan tun hi inelna lianthama an inlan hmasak ber tur a ni dawn a, an qualifying kalkawngah Portugal leh Denmark an hneh thei.

Euro-a inlan tur zingah mipui 330,000 lek awmna Iceland chu European Championship-a inlan thei ram te ber an ni - mah se he team hi qualifying-a Netherlands vawi hnih lai hneh thei an nih avangin an ram tet anga en chi an ni lo.

Dan thar

Kumin March thla khan International Football Association Board (IFAB) chuan football dan 'laws of tha game' tia hming an vuah chu ennawnna an nei a, an dan thlak leh siam thar hi June 1-a hman ṭan tura tih a nih avangin Euro 2016 aṭangin an hmang ṭan dawn tihna a ni. Laws of the game-ah 90 lai ennawn ni mah se a pawimawh zualpui chauh kan tarlang ang.

Kick-off: Tun hmain kick-off neihin a hmalam zawnga ball pet ngei ngei tur ni mah se tunah chuan a eng lam hawi zawng pawn a pet theih ang.

Pre-match red cards: Player-te chu khelmual chhung luh hmaa an nungchangin a zir lo a nih chuan red card pek theih an ni dawn a, squad-ah an aiawh tur player dah luh theih a ni thung.

Hliam enkawl: Yellow card emaw red card phawrh a ngaihnaa player a inhliam a nih chuan khelmual pawnah hruai chhuak kher loin field chhungah enkawlna pek theih a ni ang.

Triple punishment: Penalty area chhungah player-in 'professional foul' a neih chuan red card hmu loin yellow card chauh a chawi tawh ang. Hei hi 'triple punishment' (red card, penalty, suspension) an tih ṭhin nuai bo nana tih a ni.

Chhehvel

Euro 2016-a group stage inkhel tur match ticket zawng zawng deuhthaw hralh zawh a ni tawh a, opening match-a France leh Romania inkhel tur ticket erawh la hralh zawh loh langsar zinga mi a ni. Euro 2016-a match hmasa ber en man hi euro 445 (Rs. 33,800) a ni.

France-a inelna neih turah hian ticket chang lo tan UEFA chuan inelna thlengtu khawpui 10-ah fan zone an siam ṭheuh a, Paris khawpuia Eiffel Tower bula punkhawm theihna tur an siam chu fan zone an siam zinga lian ber niin mipui mipui 90,000 an leng.

Nikum November 13-ah Islamic State-ten Paris khawpui an bei a, mi 130-in nunna an chan. France sorkar chuan invenhimna a hmaa an ruahman aia khauh lehzualin a kalpui a, venhimna thawk tur police, sipai leh private security agents an hman tur ringawt hi 90,000 lai an ni.