IPL a ngaihnawm chho zel

Thawhlehni zan Indian Premier League-ah Chennai Super Kings-in Sunrisers Hyderabad chu run 20-in an hneh a, table-ah point ruk hmu team pathum awmin semifinal lut tur hriatthiam a har sawt. Mahendra Singh Dhoni kaihhruai Chennai, Hyderabad leh Rajasthan Royals ten point ruk an hmu a, Royals erawh match khatin an khel tlem thung.

Dubai International Cricket Stadium-ah Chennai-in bat hmasak an thlang a, opener Sam Curran (31), Shane Watson (42), Ambati Rayudu (41), MS Dhoni (21) leh Ravendra Jadeja (25*) te zarah run 167/6 an siam. Sunrisers Hyderabad tan target umphak theih a ni a, amaherawhchu captain David Warner-a'n run kua chauh siamin a thi a, Jonny Bairstow pawhin run 23 chauh a siam.

Sunrisers-in bul an ṭan ṭhat loh an tuar a, Kane Williamson-a'n ball 39 aṭangin run 57 siam ve bawk mah se thlawptu ṭha a nei lo. Chennai bowler Dwyane Bravo (25/2) leh Karn Sharma (37/2) te an ngam lo a, Hyderabad hian run 147/8 chauh an siam. Batting (25*) leh bowling (21/1) lama thawh hlawk Jadeja  chu man of the match a thlan a ni.

Zanin dar 7:30 hian table chung lama awm Royal Challengers Bangalore leh table mawngphaha awm Kings XI Punjab te an inkhel ang.