Euro 2016 Sulhnu nei tha Germany leh Ukraine
Germany hi football-ah chuan sulhnu nei ṭha an ni a, 2014 FIFA World Cup cham-pion an nih avangin 'hman'
aṭanga 'tun' thlengin team ṭha an ni tih a chiang. Pathianni zan dar 12:30-a an khingpui tur Ukraine erawh Soviet Union kehdarh zinga mi an ni a, April 1992 khan Hungary nen ram anga an match hmasa ber an khel chauh.
Group C inkhel dangah Poland leh Northern Ireland te Pathianni zan dar 9:30-ah an inkhel bawk dawn a, zan khatna result hian knockout stage thleng tur thui tak a nghawng ang.
Khaikhinna
Germany-in FIFA World Cup champion turin Argentina an hneh a, khami ṭuma player pawimawh Per Mertesacker, Philip Lahm leh Miroslav Klose te'n ram tana inkhelh an chawlhsan. Veteran player tel loin Joachim Low hna a harsa sawt dawn a, amaherawhchu Toni Kroos, Mesut Ozil leh Manuel Neuer te awmna team hi European champion ni tura rinkai an la ni pha tho.
Die Mannschaft hi 1972, 1980 leh 1996-ah te European championship-ah hian an champion tawh a, final ṭum ruk khel tawhin semifinal vawi riat an thleng tawh bawk. Germany hi Europe ramte inelnaah hian game khel tam ber (43), chak tam ber (23) leh goal khung tam ber (65) nihna neitu an ni a, Lukas Podolski leh Bastian Schweinsteiger te hi European Championship-ah ṭum li an inlanna tur niin Germany record kawltu Lothar Matthaus an nih rual chiah.
Joachim Low hote hi Qualifier Group D-ah awmin hmahruaitu ni mah se vawi hnih chak loin Poland nen an intluk tawk hle. Ram inhal tak pahnih hi Euro 2016-ah an awm dun leh a, last 16 lut tura rinkai ve ve an ni.
Ukraine erawhin kum 2012 khan an ramah European Cham-pionship hi an thleng a, group stage-ah tla nghalin tun hi an vawi hnih inlanna tur chauh a ni. Mykhaylo Fomenko hote hian France rama zin turin Qualifier Group C-ah Spain leh Slovakia an tluk loh avangin playoff an khelh a ngai a, Slovenia hnehin Euro 2016 khel turin an tling.
Gomez nge Gotze?
Germany hi team ṭha tak ni mah se goal khung khawl Klose awm lai pawhin club level-a khawvel huapa striker ṭha ni phak an awm loah a ngaih theih a, tun ṭumah pawh a danglam lo. Bayern-a hmun chang tam lo Mario Gotze emaw upat lama rawn vul ṭha leh Mario Gomez emaw chu tlarhma mawitu tur an ni.
Kum 30-a upa Gomez hian Besiktas tan league match 33 khelin goal 26 a khung a, goal khung aṭanga tehin 'striker class tak' tiha sawi theih ni mah se Poland captain Robert Lewandowski nen khaikhin chi a ni lo a, Sweden captain Zlatan Ibrahimovic nen huang khata dah theih a ni lo. Gomez-a awmna hmun hi Germany chak lohna laia ngaih a ni a, media kaltlanga football expert-te ngaihdan hi Gomez, Lukas Podolski leh kum 20-a upa Leroy Sane ten thlen dik lohtir an tum dawn.
Thil awm thei dang erawh natural striker tel loin Germany hi an inlan thei a, hemi ngaihdan hi Joachim Low-a'n match hmasa bera a rawn hmang a nih chuan World Cup final-a chakna goal khungtu Gotze chu hmatawngah a awm ang.
German Wall
Bayern Munich captain Philip Lahm hi loh theih loa thlak a ni dawn a, midfield-ah emaw wing back emaw pawh ni se thlak a harsa dawn. Borussia Dortmund defender Mats Hummels a la dam chian loh avang-in Jerome Boateng kawppui tur chu Shko-dran Mustafi emaw Benedikt Howedes emaw an ni dawn a, defence laiah pathum an hmang a nih chuan an pathum hian an lut ṭhawt thei bawk ang.
Wing back-ah Liverpool-a Jurgen Klopp-a'n midfield laia a chhawr Emre Can chu right back-ah awm hmel a, FC Cologne left back Jonas Hector chu vei lamah a awm hmel bawk. Midfield lamah Toni Kroos, Sami Khedira, Mesut Ozil leh Thomas Muller te chu hming nei lian an ni a, anni hian defence leh forward an thlun zawm ṭha a nih phawt chuan Ukraine tan German ral lian hi dan rual a ni lo ang.
Ukraine lam
Ukraine hi team ṭha lo zawk an ni a, amaherawhchu tawnhriat nei ṭha leh player naupang inchawhpawlhna team hian world champion barkhaih theih tur player an nei. Bayern Munich tan pawha khel tawh ṭhin Anatoliy Tymoshchuk-a'n kum 37-a upa nichungin an ram la ho dawn a, Sevilla winger Yevhen Konoplyanka hi Germany tan ven uluk a ṭul ang.
Kum 26-a upa Konoplyanka hi Europa League final-a Liverpool an hneh ṭumin inlan lo mah se season liam ta khan Sevilla tan inelna hrang hrangah match 52 zet a inlan thei a, ram inelnaah chuan hmuhnawm tham a ni ang.
Lewan'goal'ski
Poland captain Robert Lewandoski-a'n qualifier-ah goal 13 a khung a, ani aia khung hnem an awm lo. Kum 27-a upa Bayern striker hian German club tan season liam ta khan match 51-ah goal 42 a khung a, hei vang hian goalkeeper-te'n Polish striker hi hmachhawn an châk lo.
Chutihrualin Poland hi player pakhata innghat an ni bik lo a, Dortmund right back Lukasz Piszczek leh Fio-rentina winger Jakub Blaszczykowski te hi Jurgen Klopp-a kaihhruai Borussia Dortmund timawitu an lo ni tawh ṭhin a. Sevilla defensive midfielder Grzegorz Krychowiak hi enbik a sual lo bawk ang.
Northern Ireland hi a vawi khat nan European Cham-pionship-ah an inlan dawn a, qualifier-ah pawh Group F hmahruaitu ni thei ngat an ni. An player tam zawk hi English club-a khel an ni a, West Bromwich Albion defender Gareth McAuley leh Jonny Evans te, Manchester United defender Paddy McNair leh Southampton midfielder Steven Davis te hi player ṭha tak ni mah se an thiam vang ai mahin Premier League lar vanga Mizote hmelhriat an ni.
Zanin Inkhel Tur
06:30 PM Albania Vs Switzerland
09:30 PM Wales Vs Slovakia
12:30 Pm England Vs Russia
Pathianni Zan Inkhel Tur
06:30 PM Turkey Vs Croatia
09:30 PM Poland Vs Northern Ireland
12:30 Pm Germany Vs Ukraine
Inkhel hi Sony Six leh Sony ESPN-ah en theih ang.