Rafael Nadal-a'n Wimbledon khel dawn lo

World number 1 hlui Rafael Nadal chu a ban rek veilam na vangin June 27- July 10 inkara khelh tur Wimbledon-ah a hmel kan hmu thei dawn ta lo. Nadal hi karleha khelh tur Queen Club Championship-ah pawh a inlan thei dawn lo chiang tihna a ni.

Grand Slam vawi 14 champion tawh Nadal hi a ban rek na vang hian French Open third round aṭangin a lo inhnukdawk tawh a, major tournament zinga grass court-a an khelh awmchun Wimbledon-a a inlan theih ngei beisei mah se Ningani khan a inlan loh thur thu a ti chiang ta a ni.

Wimbledon champion vawi hnih lo ni tawh Nadal chuan, "Thutlukna siam harsa tak chu a ni a, mah se Roland Garros-a ka hliam tawrh avangin chawlh ka la mamawh a ni," tiin a sawi.

Kum 30-a upa Nadal hian hliam dam chiang lo chungin vawi kua a champion tawhna French Open kha a khel lui a, second round-a Facundo Bagnis a hneh ṭum pawh khan nachhawkna a chiu a ngai hial.

Spain tlangval Nadal hi tun hnaiah hliam vangin a buai ngun ta malh malh hle a, a ben rek na bakah khup, hnungzâng leh dar na vangin tournament tam takah a hmel kan hmu thei lo fo a, a hlawhltin tur angin a hlawhtling tluantling tawk lo ni pawhin a ngaih theih.

Wimbledon-ah hian kum 2008 leh 2010-a a champion hnuah Nadal hian tun hnai kum li chhung chu fourth round a paltlang lo vek a, Lukas Rosol, Steve Darcis, Nick Kyrgios leh Dustin Brown te a hneh lo a ni.

Nadal hian kuminah match 29-ah hnehna chang tawhin vawi riat a chak lo tawh a, Monte Carlo leh Barcelona-ah te champion-in Doha-ah final a lut bawk a, world number 1 Novak Djokovic a hneh lo thung.

Nadal ang chiaha Grand Slam vawi 14 cham-pion tawh Pete Sam-pras chuan Spain tlangval tennis khelh dan chu inhliam a hlauhawm thu leh Roger Federer ang ema rei a khelh theih loh mai a hlauhthawn pui thu a lo sawi ve bawk.