Zlatan Ibrahimovic-a'n a nghah a ngai!

Sweden captain Zlatan Ibrahimovic-a'n season tharah Manchester United jersey a ha ngei dawn niin a lang a, amaherawhchu contract chungchang tifel tur chuan Euro 2016 nghah a ṭul dawn niin a lang.

Sweden coach Emrik Hamren chuan, "Player-te hunawl hman danah hian tih theih ka nei lo a, ka thunun tur pawh a ni lo. Amaherawhchu Zlatan-a'n a contract tifel tura Manchester-a a zin chuan ka lawm lo ang," tiin an inkulhna hmun Nantes-ah a sawi.

Kum 58-a upa Hamren chuan sawi chhunzawmin, "Zlatan hi transfer chhehvela buai chi a ni tawh lo a, thil kalhmang a hriatchian tawh avangin 100%-in European Championship-ah buaina a nei lo ang. Sweden-ah chauh lo pawh media lamin Zlatan-a chanchin hi an ngaihven a, mah se kan bulah chuan a danglam phah lo," tiin an ram captain a fak.

Kum 34-a upa Zlatan hian Inter Milan-a amah lo enkawltu Jose Mou-rinho hnung zui a duh a, thuchiang la awm lo mah se Sweden captain hian Red Devils a zawm loh chuan thilmak a ni tawh ang.