Midfield a inbei tur Turkey vs Croatia

Turkey leh Croatia te chu Pathianni zan dar 6:30 hian Parc des Princes, Paris-ah 2016 UEFA European Championship-a an match hmasa ber atan an inhmachhawn dawn. Ram pahnihte hi champion tura rikai berte zinga mi ni lo mah se midfielder an neih ṭhat avangin team ṭha ber pawh hneh thei tur khawpa ṭha an ni ve tho.

Croatia coach Ante Cacic-a'n Barcelona midfiled-a Xavi hmunruak luahtu Ivan Rakitic bakah Real Madrid playmaker Luka Modric leh Mateo Kovacic te pathum chu inkhel khaikhawmtu atan a hmang ngeiin a rinawm a, anni bakah hian Inter Milan player pahnih Ivan Perisic leh Marcelo Brozovic te a la nei cheu bawk.

Tlarhma lamah Juventus striker Mario Mandzukic chu an inngahna tur niin, Serie A leh Coppa Italia-a Juve champion puitu striker bakah hian Nikola Kalinic leh Andrej Kramaric te pawh hian chakna goal khung turin theihna an nei.

Champions League-a Real Madrid champion puitu midfielder Modric chuan, "Kan Group hi a harsa dawn hle tih a hriat a, Turkey hnuah hian Czech Republic leh Spain kan hmachhawn zui dawn a, knockout stage lut tur chuan kan match hmasa bera hnehna kan chan nghal hi a pawimawh hle," tiin a thiam 16 zinga tel tur chuan a bul ṭan ṭhat a pawimawh thu a sawi.

Hetihlai hian Turkey hian kum 2008-a European Championship an khelh hnuah kumin hian a vawi khat nan an khel ve leh dawn a, an inlan hnuhnung ber ṭuma semifinal hruai thlengtu Fatih Terim khan a enkawl leh tawh avangin kuminah hian beiseina an nei sang hle.

Barcelona midfielder Arda Turan bakah friendly match-a England 2-1 a an hneh ṭuma goal khungtu Bayer Leverkusen star Hakan Calhanoglu leh Galatasaray duhlai Selcik Inan te midfield-ah an inkawp a nih chuan an rintlak viau ang tih a chiang a, player pathumte hian tharum an ngah bakah ball pet thiam tak vek an nih avangin innghahna tham an ni. Borussia Dortmund player pahnih Nuri Sahin leh Emre Mor te an la neih cheu bawk avangin Turkey hian an thleng thui a nih pawhin a mak lo ang.