Carrick a cham dawn

Season tawp ruala contract tawp tawh tur Michael Carrick chuan Manchester United-a kum khat dang cham turin contract thar ziah a remti.

June 2006 khan Alex Ferguson-a'n captain kal chhuak Roy Keane-a thlak nan Tottenham Hotspurs aṭangin Michael Carrick hi pound maktaduai 14 (a man hi £18.6 million thlenga sang thei a ni) in a la lut a, Keane kalsan jersey no. 16 a ha nghal bawk.

English midfielder hian United tan season 10 chhungin match 421 a inlan a, goal 23 a khung tawh. Kum 34-a upa Carrick hian Red Devils hi Premier League-ah vawi nga a champion pui bakah UEFA Champions League, FIFa Club World Cup, FA Cup leh Football League Cup-ah vawi khat ṭheuh a champion pui bawk.

Tottenham midfielder hlui Carrick chuan, "Ka hun tawn ropui tak ka chhunzawm thei tur hi ka lawm a, Jose Mourinho nen thawh dun theihna remchang ka nei tur hi ka hlim a ni. Engtiklai pawha min ṭan tlattu supporter-te chungah ka lawm takzet bawk," tiin a sawi.

November 2013-a Carrick-a contract pawh seina chu tun thla tawp hian a tawp dawn a, Australian A-League Perth Glory-in English midfielder hi beisei hman mah se Jose Mourinho-a'n Carrick hi a la mamawh.

Portuguese manager Mourinho chuan, "Mi-chael hian club tana hun rei tak a lo khelh tawh avangin a tawnhriat hi ka tan chuan a hlu dawn hle a ni," tiin Carrick nena thawhdun a châk tawh thu a sawi.