Saina leh Srikanth ten quarterfinal lut

Australian Open Super Series badminton tournament khelh mekah Indian shuttler Saina Nehwal leh Srikanth Kidambi te chuan Ningani khan an khingpui ve ve hnehin quarterfinal an lut.

World number 1 hlui Saina hian inkhel bul a ṭan fuh lo a, game hmasa zawkah 1-4 in hniam zawk mah se a che sual nawn lo, minute 37 chhungin Malaysia nula Jin Wei Goh chu 21-12, 21-14 in a hneh. Kum 26-a upa Saina hian semifinal lut tur chuan 2013 world champion leh seeded pahnihna ni bawk Ratchanok Intanon a paltlang a ngai leh dawn.

Mipa single-ah Srikanth chuan minute 34 chhungin Indonesia shuttler Dwi Kuncoro chu 21-19, 21-12 in a hneh a, world number 13 Kwang Hee Heo a hma-chhawn zui ve leh bawk dawn a ni.

Badminton World Federation (BWF) chuan Ningani khan world ranking thar a ti chhuak a, Saina chu 8-na niin Srikanth chu 12-na a ni thung. Malaysian shuttler Lee Chong Wei chuan Chen Long khumin mipa number 1 nihna a hauh.

Kum 2014 August thla a neih World Championship-ah khan Chong Wei hian damdawi hman phal loh a hmang tih hmuh chhuah a ni a, kum hnih chhung hrem theih a ni. Mahse, Chong Wei hian a tihpalh thil thuin he damdawi hi a ei tih hriat chhuah a nih avangin hremna na lo zawk a hmachhawn. Hrem a nih aṭanga thla 18 hnu lekah number 1 dinhmun a rawn luah leh thei ta a ni.