Copa America Centenario USA tan chak a pawimawh; Brazil an him lo

Naktuk zing dar 4:30-ah USA-in Copa America khelh meka an group stage hnuhnung ber an khel dawn a, an hmachhawn tur Paraguay nen last 16 luh beiseina an la neih ve ve avangin inkhel hmuhnawm ni tura beisei a ni.

Group A inkhelah vek last 16 lut chiang tawh Colombia chuan beisei tur nei tawh lo Costa Rica an hmachhawn dawn a, team pahnih dinhmun tur a chian tawh avangin result vangin thil danglam a thlen phah loh ang.

Thawhṭanni zing dar 4:00-ah Ecuador leh Haiti an inhmachhawn dawn a, zing dar 6:00-ah Brazil leh Peru an inhmachhawn bawk ang - Group B team pali zingah Haiti chiah beisei tur nei tawh lo an nih avangin he group inkhel results hi a ngaihnawm dawn.

Driver seat-ah US!

Inelna ṭan a nih hmain USA coach Jurgen Klinsmann-a'n a sang pali zinga tel an tum thu a sawi a, an match hmasa berah Colombia 2-0 in an hneh lo. Mahse, US insiamṭha nghalin an match hnihnaah Costa Rica chu 4-0 in an sawp a, quarterfinal luh beiseina an nei ve leh.

Klinsmann-a'n Costa Rica an sawp hnuah quarterfinal lut turin driver seat-ah an ṭhut thu a sawi a, zawhna awm chu last 16 thleng an in khalh thleng zo ang em? tih hi a ni. USA hian Paraguay an hneh emaw an chak a nih chuan quarterfinal an lut chiang ang a, an chak zo lo a nih erawh chuan Paraguay an lut daih ang.

Costa Rica tan erawh beisei tur a awm tawh lo - last 16 lut tur chuan US leh Paraguay an inhnehtawka Colombia 7-0 vel tala an sawp a ngai dawn. Hei hi thil thleng thei lo tluka ngaih a ni.

Beiseina nen Brazil

Brazil-in an match hmasa bera Ecuador chu goal khung loa an inhnehtawkpui hnuah Haiti 7-1 in an sawp a, an phur vanglai tak a ni. Mahse, Brazil tum tur hi anmahni ang thoa Ecuador inhnehtawkpui a, Haiti hnehtu Peru an nih avangin an kalkawng a awlsam dawn lo.

Selecao (Brazil sawina) tan last 16 lut chiang turin chak a pawimawh dawn. Tun dinhmunah pathumna Ecuador-in point hnih chiah hmuin Brazil leh Peru phak lo mah se last-16 lut thei dinhmunah an la ding ve tho.

Ecuador hi Haiti sawp thei tur khawpin an ṭha tawk - Mohun Bagan winger Sony Norde telna ram hi an sawp a, Brazil leh Peru an inhnehtawk bawk chuan goal difference hmangin an tlang daih thei. Haiti hi sawp kher loa an hneh ringawt a, Brazil leh Peru inkhelah chak lo zawk an awm a nih chuan Ecuador hi an tlang daih thei bawk.

Sawifiah dan awlsam berah chuan pathumna Ecuador hi Haiti hneh ngei tura ngaih an nih avangin pakhatna Brazil leh pahnihna Peru inhmachhawn turte aiin last 16 luh theihna chance a sang zawk - Thawh-
ṭanni zingah chinfel a ni dawn e.