Roger Federer a chak phawt

World number 3 Roger Federer chuan kum-ina a grass court tournament khelh hmasak berah hnehna a chang nghal a, Ningani khan Taylor Fritz lakah 6-4, 5-7, 6-4 a hnehna changin Mercedes Cup second round a paltlang.

Grand Slam vawi 17 champion tawh Federer hian tennis a khelh hun chhungin match 1,071 hnehna a channa chiah niin Ivan Lendl record a nih rual chiah a, quarterfinal-ah hnehna a chang zui a nih chuan mipa single-a hnehna chang tam ber nih theihna hun a nei dawn a ni.

Swiss thiampuipa Federer chuan, "Hma-sawnna tur chu ka la nei reng a, kan inkhelh hmasak khan ruah surin min tih buai avangin a tuka chhunzawm a ngai leh hian rilru chu a la peng ve hle. Ka service a ṭha leh tawh a, ka taksa tih chak ka la mamawh thung," tiin hliam vanga a lo kir hnuah a taksa a la chak tawk loh thu a sawi.

Mipa inkhel dangah Juan Martin del Potro chuan John Millman lakah 6-4, 6-4 a hnehna changin quarterfinal a lut ve bawk a, 2014 US Open champion Marin Cilic erawh Radek Stepanek-a'n darkar khat leh minute 42 chhungin 7-6, 7-5 in a hneh thung.