Inhmachhawn tura beisei Xhaka te unau

Zanin dar 6:30 hian Switzerland leh Albania te chu European Championship 2016-a an match hmasa ber atan Stade Bollaert Delelis-ah an inhmachhawn dawn a, Arsenal player thar Granit Xhaka leh a u Taulant Xhaka te an inhma-chhawn beisei a ni.

European Championship chanchinah tun hmain unaua inhmachhawn an la awm ngai lo a, zanin hian Swiss tan Granit Xhaka a inlan a, Albania tan Taulant Xhaka a inlan bawk a nih chuan Euro football chanchinah bung thar ziah a ni dawn.

Xhaka te unau hi an nu leh pa te chu Albania mi an ni a, an unaua an pian hma hian Basel, Switzerland-ah an pem. Age level-ah chuan Xhaka te unau hi Switzerland tan an khel ve ve a, senior level an luhchilh dawnah a upa zawk Taulant hian Albania tana khelh a thlan laiin a naupang zawk erawh Swiss tan a khel chhunzawm zel thung.

Kum 23-a upa Xhaka hian Bundesliga club Borussia Monchengladbach aṭangin Premier League-a pahnihna Arsenal chu pound maktaduai 30 velin a zawm a, Swiss tan match 41 a khelh aṭanga goal ruak a khung tawh avangin Albania lakah pawh hian an hmachhuan tur a ni ang. Kum 25-a upa Taulant hian Albania tan match 10 a khel ve tawh bawk.

Swiss midfielder Xhaka chuan, "Kan unau hian tun hmain vawi khat kan lo inhamchhawn tawh a, chutih lai chu Basel tana a khelh lai niin ka u chu Grasshopper Zurich tan a khel thung. Kan chhungkua pawhin Euro 2016-a kan inhmachhawn tur hi kan sawi ho leh tawh a, kan châk tawhin kan phur hle. Ka u nen hian kan inkar boruak a ṭhain unau kan nih bakah hian ṭhian ṭha tak pawh kan ni tel," tiin a sawi.

Sawi chhunzawmin Arsenal mid-fielder thar Xhaka chuan, "Kan unau hian Switzerland-ah kan piangin kan sei lian a, Albania ka hmuh hmasak ber chuan kum 12 ka ni tawh. Mahse, kan ngainat em avangin tun thlengin he hmunah hian chawlh ka neih chuan kan kal fo. Albania hian an ram tana khel turin min ngaihven lem lo a, ka u erawh chuan chanchin dang a nei thung," tiin an unaua ram inang lo tana an khel chu an dunthlanna a nih thu a sawi.

Ram pahnihte intawn tawhna thlirin Switzerland hi chak zawk tura rinkai an ni a, an intawn hnuhnung vawi rukah vawi nga hnehna changin ṭum khat an inhnehtawk thung. Albania hian hnuhma chhuan tur an nei tam lo. European Championship khel tur zingah pawh hian goal khung tlem ber niin goal sarih chiah an khung a, Serbia nen an inkhelh laiin buaina a chhuah avangin 3-0 a chak zawka puan an ni a, goal for pawh 10 ni chho mah se France rama zin zingah tluk phak an nei chuang lo.