Euro 2016 England bul tanna tur Russia

Euro 2016-a team ngaihven hlawh ber pawl chu England an ni - Roy Hodgson-a naute hian zanin dar 12:30-ah an match hmasa ber khel turin Russia an hmachhawn dawn a, football ngainatuten team pahnih inhmachhawnna tur Marseille khawpui lam an hawi ang.

Kum 1996-ah England-in Euro an thlen ṭumin an ramah ngei semifinal an lut a, hei aia sang hi Europe-a ram leh ram inelnaah hian an la thleng ngai lo.

England first keeper Joe Hart chuan, "Euro '96 kha kum-kaw mi lek nichungin ka en a, ka tan chuan tournament hriat reng tawh tur a ni. Kuminah hian naupangten an ṭhanlen thlenga an hriat tur European Championship thlentir ka duh a ni" a ti - Manchester City keeper hian a thusawi hi thlentir a duh a nih chuan zanin aṭangin bul an ṭan a ngai ang.

Team dinhmun

England tan defender Ryan Bertrand chu hliam vangin a inlan theih a beiseiawm loh a, Southampton left back hi kar hmasaa Portugal nen friendly match an khelh ṭum pawhin a inlan thei tawh lo.

Manchester United defen-der Chris Smalling-a'n hliam tenau nei mah se inkhel bul a ṭan beisei a ni a, Leicester City striker Jamie Vardy aiah Raheem Sterling chu inkhel bul ṭan tura beisei a ni bawk.

Hliam damkawr Jack Wil-shere-a'n a dam tawh tih practice-naa a pholang thei a nih phawt chuan inkhel bul ṭantir a nih beisei a ni a, Arsenal midfielder hian ngai a awh hman lo a nih erawh chuan Adam Lallana chu a aiah hian lut tura rin a ni.

Russia coach Leonid Slut-sky-a'n 4-2-3-1 formation a hmang uar a, winger tlan chak pahnih hmangin counter attack-ah a innghat ṭhin. Mahse, Russia hian an attacking midfielder pawimawh Alan Dzagoev chu hliam vangin France-ah an hruai thei lo a, Dynamo Moscow midfielder Igor Denisov chu Thawhlehni khan hliam vang a inhnuhdawh a ngaih bawk avangin Slutsky-a'n midfield-ah an ṭhat dan berin players a remkhawm thei dawn lo.

Euro zin kawng

England-in Euro 2016 khel turin harsatna an tawk lo - Qualifying round-a inkhel an hmachhawn 10-ah hnehna chang vekin France-a kalna tur ticket an hlawh chhuak. Hetihrual hian England hi in chhuang lutuk tur an ni lo - Euro kalkawnga an hneh Switzerland, Slovenia, Estonia, Lithuania leh San Marion zingah hian champion rinkai ni phak an awm lo.

Fabio Capello hoa Euro 2016 zinkawng ṭantu Russia-in an kalkawngah Italian coach an ban a, Russian manager Slutsky hoin Euro khel turin an in pet tling. Russia hian Capello hnuaiah match ruk khel hmanin vawi hnih an chak a, vawi hnih tlawmin an khingpui vawi hnih vek an inhnehtawkpui.

England manager hlui Capello ban a ni a, a aiawh turin CSKA Moscow coach Leonid Slutsky lakluh a ni. Kum 45-a upa manager hian match li khelh hmabak an la neihah Russia chu hnehna a chanpui vek a, Austria, Sweden, Montenegro, Liechtenstein leh Molodova awmna group-ah pahnihna dinhmun luahin France-ah Russia a hruai thleng.

Tun hnai

Qualifying khelh zawh hnua an khelh dan enin Russia aia England chak i beisei zawk a nih chuan i tisual lo - Qualifier-a hneh loh nei lo England hian France zin hmaa friendly match vawi sarih an khelhah vawi hnih chiah tlawm hmel an hmu.

Spain laka 2-0 a hnehna an chan loh hnuin France (2-0), Germany (3-2), Turkey (2-1), Australia (2-1), Portugal (1-0)-te an hneh. Russia tana inhnemna awm thei erawh England hian friendly match an khelh zingah rin hlawh lo zawk Netherlands chu Wembley-ah 2-1 in an hneh lo a, Russia tan Euro khel lo tur Netherlands tih theih hi tih theih loh bikna chhan tur a awm lo.

Russia-in qualifier an khelh zawh hnuah friendly match paruk tho an khel a, Portugal (1-0) leh Lithuania (3-0) lakah hnehna chang mah se Croatia (3-1), France (4-2) Czech Republic (2-1) lakah tlawmin Serbia (1-1) nen an inhnehtawk - England lakah erawh hnehna chan ngei tumin an khel ang.

Hart a thinlung a paukhauh!

Euro 2016 khelh turah chawhrualin England players an naupang ber a, an kum zat chawhrual hi kum 25 leh 308 a ni - kum 58 hnua Euro khel tur Eng-land squad naupan ber ṭum a ni.

England squad-in tawnhriat la nei tlem mah se goalkeeper Joe Hart erawh a zam phah lo.

Kum 29-a upa keeper chuan, "Kan ruahman anga engkim a kaltluang a nih chuan thui tak thleng kan kal thei ang tih ka chiang a ni. Team angin tlarhmaah na takin kan nawr ang a, goal venhim a ṭul hunah chuan kan venghim leh vek mai ang. Theihtawp chhuahin kan bei dawn a, inbuatsaihna ṭha tak kan neih avangin kan inpeih tawh a ni," tiin inkhel hmachhawn tura an inpeih tawh thu a sawi.

Chhehvel

Probable XI

England (4-3-3): Hart, Rose, Smalling, Cahill, Walker, Dier, Wilshere, Alli, Sterling, Kane, Rooney.

Russia (4-2-3-1): Akinfeev, Kombarov, Berezutski, Ignashevich, Smolnikov, Glushakov, Ivanov, Shatov, Golovin, Kokorin, Dzyuba.

Team pahnih hi tun hmain vawi hnih an lo inhmachhawn tawh a, an inhmachhawn hi Euro 2008 qualifying match a ni.

First leg hi Wembley-ah khelh niin Michael Owen goal hnih leh Rio Ferdinand goal hmangin England 3-0 in an chak.

Moscow khawpuia second leg khelhah Russia-in 2-1 in hnehna an chang thung a, England tan Rooney chuan goal khat khungin Roman Pavlyuchenko chu Russia tana goal hnih khungtu a ni.