Player pakhata innghat lo Wales

Wales player pawimawh Gareth Bale chuan Euro 2016 khelh turah an ram chu amahah chauh an innghah loh thu a sawi. Kum 1958 World Cup hnua inelna lianthama a vawi khat nana inlan leh tur Wales hian zanin dar 9:30-ah Slovakia an hmachhawn ang.

Euro qualifying round-a Wales goal 11 khung zinga goal sarih khungtu Bale chuan, "Player pakhat chauha innghat team kan ni lo a, player 11 in inkhel bul kan ṭan dawn a ni. Team kan nihna angin kan thawk ho dawn a, Wales thupui 'ṭanrual hi chakna' tih hi a thlawn mai maia hmang kan ni lo - team angin kan thawk ho vek dawn," tiin an ram chu player pakhata innghat an nih loh thu a sawi.

Real Madrid forward chuan nuam ti taka inkhelh chiah a ngaihtuah thu sawiin, "Naupang kan nih laia khelmuala nuam ti taka kan khel anga inkhelh mai kha ka duh chu a ni. Wales squad-a mi te hi unau ang maiin kan inpawh tlang a, ṭhian ṭha tak vek kan ni. Kan hmaah thil tih tur lian tham a inchhawp a nih chuan inthurualin huaisen takin kan bei
ṭhin. He hmunah hian nuam ti taka inkhel tura lokal kan ni - nuam ti taka kan khelh chuan kan khel
ṭha ṭhin a ni," tiin player-te chuan pressure nei loa an khelh theih a pawimawh thu a sawi chhuak.