Mexico leh Venezuela tlang niah Uruguay an tla

Copa America Centenario khelh ṭan a nih hma kha chuan Uruguay hi champion tura rin berte zinga mi an ni. Mahse, nimin zing khan he inelnaa champion ngun ber ram hian Venezuela 1-0 in an hneh lo a, group stage an paltlang thei tawh lo.

Ningani zing inkhel dangah Mexico chuan Javier Hernandez leh Oribe Peralta te goal khung hmangin Jamaica 2-0 in an lo hneh ve bawk a, match hnih an khelh aṭanga hnehna la chang ve ve Mexico leh Venezuela ten point ruk hmuin Group C aṭangin quarterfinal an lut chiang tawh.

Lincoln Financial Field, Phi-la-delphia-a inkhelah forward Salo-mon Rondon chuan firsthalf-ah he inkhela goal awmchhun hi a khung a, Uruguay forward Cristhian Stuani chuan second half-ah si phurh sut theihna hun ṭha bik nei mah se Venezuela goalkeeper Daniel Hernandez a paltlang thei lo.

Uruguay tan striker Luis Suarez chu dam tawh mah se an la khelh tir lo a, coach Oscar Tabarez-a'n an match hmasa bera Mexico 3-1 a an hneh loh ṭuma player pathum siaksawiin Cristhian Stuani, Gaston Ramirez, Alvaro Gonzalez leh Gaston Silva te chu Diego Rolan, Nicolas Lodeiro, Matias Vecino leh Alvaro Pereira te aiah a luh tir.

Uruguay hian inkhel ṭan aṭanga minute 15-na lekah goal hmahruai khung theihna hun an nei a, Gonzalez ball pek dawngtu Edinson Cavani chuan goal-ah a chan tir zo lo. Suarez awm loh laiin Paris Saint-Germain forward hian an ram a chak pui tur khawpin a khel ṭha zui lo.

Copa America biakah Venezuela hian Uruguay hi an hneh khat hle a, vawi kua an inhmachhawn tawhna aṭanga an vawi khat hnehna chauh niin goal khungtu Rondon hi an ram player zingah he inelna ṭum thuma goal khung vek thei hmasa ber a ni bawk.

Tabarez chuan Suarez a khelh tir loh chungchang sawiin, "Ka player hi 100%-a a fit lo a nih chuan inkhelh luih tir ka duh lo. Nakinah harsatna neih blehchhah se a pawi zawk a, inkhel turin a la inpeih lo a ni," tiin a sawi.

Copa America vawi 15 cham-pion tawh Uruguay hian an group match hnuhnung ber atan Thawhlehni zing dar 7:30-ah Jamaica an hmachhawn leh dawn a, tla chiang tawh pahnih inkhel result-in awmzia a nei tawh lo ang.