France tan Dimitri Payet a inlar

Goal mawi a awm a, goal pawimawh a awm bawk. 2016 European Championship hawnna inkhelah inelna thleng-tu France tan hun tawp hma minute khat chiah a awm tawh tihin Dimitri Payet-a'n goal mawi leh pawimawh inkawp a khung a, chakna goal thuntu West Ham star hi minute 90 chhunga cheṭha ber a ni bawk.

Zirtawpni zanah France-in Olivier Giroud leh Payet te goal hmangin Romania chu 2-1 in an hneh a, Tricolorii (Romania kohna) tan Bogdan Stancu-a'n penalty aṭangin a khung ve bawk. Group A inkhel dangah Switzerland-in minute ngana leka Fabian Schar goal hmangin player 10-a khel Albania an hneh.

Sira hnawl hnu

Nikum nipui lai khan West Ham-in Marseille aṭangin pound maktaduai 10.7-in Payet an la lut a, France ramah chuan a lar tawh hle. Amaherawhchu khawvel huap ang chuan Payet hming a ri pha lo a, kum 29-a upa a nih tawh avangin tun hma zawng khan khawiah nge a awm le? tih hi zawhna awm thei tak a ni.

France striker hlui Thierry Henry chuan, "Player hliam tuar chak duh ngawih ngawih in hmu a ni. 2014 World Cup qualifier-ah khan a khel kim vek a, Brazil zin ve turah inngai mah se koh a ni lo. France tana khelh hi a duh ngawih ngawih tih a lang a, hun tawp dawna a mittui khan engkim a sawifiah a ni," tiin Payet-a chungchang a sawi.

Payet hian October thla khan ram tana koh a ni ve lo chu a chetṭhat lai a nih avangin hriatthiam har a tih thu a lo sawi tawh. Hammers star chetdan hi Arsenal legend Henry chuan, "Romania nena a khelh danin a sawi chu 'World Cup-ah min hruai lo a, ka theihna ka lantir dawn che u' tih a ni. Ball zawng zawng chang turin theihtawp a chhuah a, team pawt kaltu a ni," tiin thiam takin a fak.

Payet Show

France-in thil ṭha an tih chuan Payet a inrawlh zelah a ngaih theih a, West Ham midfielder hian vawi 87 ball a khawih a, N’Golo Kante (101) chiah a tluk lo. Payet hian goal khung theihna chance pawh vawi riat zet a siam a, a teammate chance siam zat belhkhawm let a ni.

Payet hian minute 88-naa goal ropui a khung hma hian minute 57-naa Olivier Giroud-a tauh goal tur chu a lo siam sak tawh. A chance siam sak zingah Romanian defender engemaw zat a bum hnua Paul Pogba volley tur a siam chu a langsar viau bawk.

Minute 65-naah France defen-der Patrice Evra-a'n Nico-lae Stanciu a tihtluk vangin penalty a chawi a, Bogdan Stancu-a'n goal-ah a chantir. Didier Deschamps-a'n inkhel thlak danglam turin substitution a siam a, France player zinga sawi vul ber Paul Pogba chu Antony Martial-a'n rawn thlakin Payet chu a lai lum luahtir a ni. World Cup 98-a France champion puitu captain Deschamps-a'n thutlukna a siam sual lo a, hmuh pawimawha awm Payet-a'n goal pawimawh a khung.

Romania lamin qualifier match 10-a an goal chhuah zat goal hnih an chhuah nghal a, an khelchhia tihna erawh a ni lo. Tricolorii goal nawr vangin France tlarhnung an buai fo a, point hmuh phu mah se Payet chetṭhat ṭum an tawng a, an vanduai a ni.

Eng nge an sawi?

France boss Didier Des-champs chuan, "Dimitri hian game a thlak thei ka hria a, a theihna hi ka ringhlel ngai lo. Goal kil taka pet luh theih chuan harsatna tam tak a su kiang a ni," tiin Payet a fak a, opening match khelh a harsat thu a sawi tel bawk.

Romania coach Anghel Iordanescu chuan, "Kan inkhel kha a ṭha thawkhat a, sawisel tur leh fak tur a awm ve ve. Goal chance neih kha khung ilang chuan result a dang ang, second half ṭantirha Stancu hlah kha a uiawm lehzual," tiin a sawi.

Hun danglam

Swiss midfielder Granit Xhaka leh a u Taulant Xhaka te Stade Bollaert-Delelis-ah an intawng a, European Cham-pionship-a unaua inhmachhawn hmasa ber an ni. Arsenal lakluh thar Granit Xhaka hian vawi 129 ball khawihin ball vawi 115 a pass a, tehna pahnihah hian tluk pha an awm lo. Swizerland defender Schar-a'n minute ngana lekah Xherdan Shaqiri corner pet a tauh lut a, Swiss hian inkhel thunun mah se Albania tan Armando Sadiku-a'n chance ṭha a hlah bakah captain Lorik Cana chu minute 36-naah hnawhchhuah a ni bawk.

Switzerland leh Albania hi vawi ruk an intawng a, vawi khat an indraw tih loh chu Switzerland an chak vek.

Hmabak

Nilaini zan 12:30-ah hian France-in point la hmu Albania an hmachhawn ang a, hemi zan dar 9:30 hian Romania leh Switzerland an inkhel leh bawk ang.