Steph Curry leh GSW-in Cleveland an ngam

Champion lai Golden State Warriors tan an nomawi humhim turin vawi khat chak bak a ngai tawh lo. Golden State hian Stephen Curry point 38 score hmangin Inrinni zing khan Cleveland Cavaliers chu 108-97 in an hneh a, 2016 NBA Finals best of seven series-ah 3-1 in hma an hruai ta.

NBA Finals game hmasa pahnihah Steph Curry leh a team GSW ten hnehna an chang a, game 3-ah LeBron James leh a team Cavs te thochhuakin beiseina thar an neih ve leh avangin Game 4 hian ngaihvena a hlawh thar phah hle.

Amaherawhchu, Cavs khelmual hmanthiam The Q Arena-ah NBA Most Valuable Player Curry-a'n a thiam bik zia a pholang leh a, three points vawi sarih ngawt a vawm lut. American point guard hian Finals an inkhelh hmasak pathumah chawhrualin point 16 zel chauh score ang ni mah se game 4 quarter hnuhnung berah ringawt point 13 score-in a dan pangngaiin inkhel result ti danglamtu a ni.

Hun pawimawhah CLE an huaisen tawk lo a, quarter thumna an khelh ṭan tirh lamin 63-55 in hma an hruai hman. Mahse, ṭul lo taka turnover an neih fo bakah quarter hnuhnung ber an khelh laiin minute ruk chhung ngawt point an score miah lo a, hun pawimawhah an talbuai tih hai rual a ni lo.

MVP vawi li lo ni tawh James hian kum 2012 leh 2013 khan Miami Heat chu NBA Finals-ah hian hnehna a lo chanpui tawh a, mahse tun hnai season hnih chhung chu a chak lo lamah a ṭang ta. Nikum khan Cleveland tan khelin GSW hi an hneh lo tawh a, kuminah pawh a dinhmun ṭha lo zawk lamah a ding leh ta mek.

Golden State coach Steve Kerr chuan a player duhlai Curry chungchang sawiin, "MVP a nih chhan chu kan hmu leh ta, Steph hi a pumrua a len loh bakah tharum a ngah lo a, mahse a thiamna leh finna hmangin roreltu a ni ṭhin. Inrintawkna a neih san em avangin point pawh a score hnem thei reng a ni," tiin chuh buaitu nei loa MVP atana thlan hmasak ber chu a fak hle.

Thawhlehni zing dar 6:30 hian Oracle Arena, Oakland-ah Game 5 an khelh hunah GSW hian anmahni khelmual ngeia champion theihna hun an nei dawn. NBA Finals chanchinah eng team mah 3-1 a an hnufual hnuah a chak zawka ṭang let thei an awm ngai loh avangin Cavs hna hi a hautak tawh hle dawn a ni.

Inkhel Thlirna Tawi

Team 1st 2nd 3rd 4th Tot

GSW 29 21 29 29 108

CLE 28 27 22 20 97