Messi goal thum hmangin Argentina an tlang
Lionel Messi chuan a hliam a dam tawh a ni tih entir nan Panama lakah minute 21 chhung lekin goal thum a khung a, Inrinni zing khan Argentina chu 5-0 a hnehna chanpuiin Copa America Centenario quarterfinal a hruai thleng. Inkhel dangah champion lai Chile chuan Bolivia lakah 2-1 in hnehna an chang ve bawk.
Soldier Field, Chicago-a in-khelah defender Nicolas Otamendi chuan minute sarihna lekah Angel Di Maria freekick tauh lutin goal hmahruai a khung. Panama midfielder Anibal Godoy chu yellow card vawi hnih hmuh vangin minute 31 lekah hnawhchhuah a ni a, a bak zawng chu Argentina chan a ni tawh.
Gerardo Martino-a'n second-half-ah a player dah ṭhat a phawrh a, minute 61-naah Messi chuan Augusto Fernandez a rawn thlak. Barcelona star hian minute 68', 78', 87'-ah te goal khungin Panama tlarhnung a sawisa a ni ber a, bench aṭanga tlan lut tho Sergio Aguero chuan hun tawp hma chiahin a khung ve bawk.
Ram tana goal 53 khung tawhtu Messi chuan, "Inkhelhna grass kha a san deuh avangin ni dang a ang lo tih chu a hriat a, mah se kan vaiin kan khel ṭha tlanga a rah pawh kan hmu e. Beisei phak bakin min
ṭantute an lo kal hnem a, anni zarah kan hlawhltin ka beisei," tiin a sawi.
Argentina hi quarterfinal an luh avangin lawm viau mah se an lawm a kim bik lo. Winger Di Maria chu malpui na vangin lakchhuah a ngi a, Paris Saint-Germain star hi Copa tawp hmain a rawn let leh hman dawn leh dawn loh a chiang ta lo.
Kum 28-a upa Di Maria hi a vanduai thei hle a, FIFA World Cup leh Copa final chu hliam vangin a lo khel thei lo tawh. Copa America Centenario ṭan hmain harsatna nei loa tournament khelh tluan theih a chak thu lo sawi tawh mah se Chile an hneh ṭuma goal hmahruai khungtu hi tun ṭumah hian a hmel kan hmu tawh lo mai thei. Hetihlai hian Argentina doctor-te chuan atira an ngaih ang ai chuan Di Maria hliam hi a na lutuk lo deuh niin an sawi thung.
Argentina hian an match hmasa zawkah Chile 2-1 in an hneh tawh a, Panama an hneh leh tak avang hian point ruk hmuin Group D aṭangin quarterfinal an lut chiang tawh. Kum 23 chhung zet inelna lian thama an champion loh hnuah hun ṭha an nei leh ta. Nilaini zing dar 7:30-ah tla chiang tawh Bolivia an hmachhawn leh ang.
Chile an vannei
Champion lai Chile tan knockout round lut turin point hloh a thiang tawh lo a, minute 101-naa Arturo Vidal penalty chhuih luh hmangin Bolivia 2-1 in an hneh a, beiseina an la neih chhunzawm zel.
Gillette Stadium-a inkhelah Chile tan Bayern Munich midfielder Vidal chuan second half ṭan tirhah freekick aṭangin goal hmahruai a khung a, Bolivia tan midfielder Jhasmani Campos-a'n minute 61-naah a sut leh.
Bolivia hian an match hmasa zawka Panama an lo hneh tawh avangin quarterfinal lut turin Chile lakah hian point khat an hmu a nih chuan an dinhmun a ṭha tawh dawn. Mahse, Luis Gutierrez handball chu assistant referee-in a ham miau avangin minute 101-naah Vidal-a'n chakna goal a khung.
Nilaini zing dar 5:30 hian Chile leh Panama te an group match hnuhnung berah an inhmachhawn dawn a, point thum ve ve an neih tawh avangin quar-terfinal lut turin beiseina an la nei ve ve a, chak loh a thiang lo ang.