Belgium hmaa ding tur Italy

Euro 2016 khel zinga FIFA ran-king-a sang ber Belgium (2) leh football khawvela palian Italy te chuan zanin dar 12:30 hian Stade de Lyon-ah an match hmasa ber an khel dawn.

Team pahnihte hi champion tura rinkai phak an ni a, qualifying-ah pawh an che na hle. Belgium hi Group B-ah awmin point 23 hmuin hmahruitu an ni a, Italy pawh Group H hmahraitu niin point 24 an hmu thung.

European Championship-ah ram pahnihte hi vawi hnih an inhmachhawn tawh a, kum 1980 khan goal awm loin an inhnehtawk. Kum 2000 khan intawng lehin Francesco Totti leh Stefano Fiore te goal khung hmangin Italy 2-0 in an chak. Hemi ṭum hian tuna Belgium coach Marc Wilmots leh Italy coach Antonio Conte te chu player la niin khelmual chhungah an inhmachhawn nghe nghe.

Belgium hian hliam vangin an captain Vincent Kompany an hruai tel thei lo a, Eden Hazard chu captain tur a ni ang. Chelsea playmaker hian a keah hliam tenau tuar mah se inkhel thei tura beisei a ni. Ani bakah hian Kevin De Bruyne hi hmuhnawm khawpa thiam a ni a, keeper Thibaut Courtois hi innghahna thiam a ni. Striker Romelu Lukaku leh Christian Benteke te hi ven uluk ngai bik an ni.

Italy hi ram leh ram inelnaah chuan engtiklai mahin an hniam ngai lo. Kuminah hian Euro hnu-hnung bera final hruai thlengtu Andrea Pirlo chu koh zingah a tel lo. Player langsar fal sawi tur nei hran lo mah se keeper Gianluigi Buffon aia ṭha hi ram dangin an nei bik lo ang. Juventus defender Giorgio Chiellini hoin tlarhnung an inremkhawmin a rinawm a, Daniele De Rossi-a ball pet thiam zia inhrilh nawn a ngai lo bawk.

Tun hma chuan

Kum 2000 khan Netherlands leh Belgium ten European Cham-pionship hi an inthlen ṭawm a, hemi hnuah kumin hi he inelnaa Belgium an inlan vawi khatna tur chauh niin a pumpuiah ṭum nga an inlanna tur a ni thung.

Red Devils (Belgium sawina) hian Euro 1980 khan final an lo lut ve tawh a, mah se West Germany lakah 2-1 in an tlawm. Kuminah an player ṭha rual nen beiseina an nei sang hle.

Italy hian European Cham-pionship hi an vawi kaw khelhna tur niin vawi hnih (1996 leh 2004) an champion tawh a, kum 2000 leh 2012 khan final-ah a chak lo zawkah an ṭang thung.

Sulhnu nei ṭha hle mah se Italy hian Euro 2002-a an match hmasa bera Turkey 2-1 a an hneh hnuah inelna bul an ṭan niin hnehna an la chang leh lo. An khingpuite nen vawi hnih inhnehtawkin ṭum khat chu an chak lo thung.

Eng nge an sawi?

Belgium head coach Marc Wilmots chuan, "Hazard hliam kha na tak a nih loh avangin Italy lakah hian inkhel bul a ṭan theih ngei ka beisei. Defender Thomas Vermaelen pawh training-naah a khel ṭha a, harsatna a neih tawh loh avangin inkhel turin a inpeih," tiin a sawi.

Italy manager Antonio Conte chuan, "Tlarhnungah Juve player rem tlar hi a fuh mai thei, anni hian season ṭha tak an hman baka kumtluana awmkhawm an nih avangin an in hrechiang. Mahse, a pawimawh ber zawka chu a hnung ber aṭanga a hma ber thlenga kan
ṭanrual theih dan tur ngaih tuah a ni zawk. Goal tam tak khung kher a ngai lo a, kan khingpuite aia khung tam bakah goal chhuah tlem zawk a tawk mai," tiin tlarhnung a ngaihpawimawh thu a sawi.