Copa America Centenario Quarterfinal-ah a thlengtu USA an lut

Nimin zing khan Copa America inkhel ngaihven hlawhah USA chuan Clint Dempsey goal khung hmangin Paraguay 1-0 in an hneh a, quarterfinal an lut.

He inkhela goal awmchhun hi minute 27-naa lut a ni a, Gyasi Zardes ball cross ṭha tak chu Fulham winger hlui Dempsey-a'n harsatna nei loin a khung. USA defender DeAndre Yedlin chu yellow card vawi hnih a chawi avangin minute 48-na lekah hnawhchhuah ni mah se Paraguay-in player tam zawk an nih an chhawr ṭangkai thei lo.

Paraguay-in hnehna an chan zawh loh avangin Copa America-ah beisei tur an nei tawh lo a, kum 2001 hnuah group stage
aṭanga an tlak vawi khatna a ni.

USA coach Jurgen Klinsmann a pawr nghal a, German manager chuan, "Thawnthu hlui chu eng inelnaah pawh rinkai kan ni ngai lo tih hi a ni a, he thawnthu hlui ninawm zet hi kan hnuchhawn a hun ta. Huaisen taka engkim pal turin ka player-te ka duh a, risk kan la a nih loh chuan engtikah emaw kan tlu dawn tihna a ni," tiin quarterfinal-ah tawp an tum loh tur thu a sawi nghal.

Pathianni zing Group A inkhel dangah Costa Rica chuan tling chiang tawh Colombia an barakhaih a, 3-2 in an hneh. USA leh Paraguay laka hnehna an chan hnuin Colombia coach Jose Pekerman-a'n a starting eleven regular aṭangin player 10 lai a thlak danglam a, Colombia 'ṭha lo zawk' lakah Costa Rica-in tlawm an duh lo.

Costa Rica tan Johan Venegas (2') leh Celso Borges (34') ten goal an khung bakah Colombia full-back Frank Fabra (34') chuan an lamah a ti lut bawk a, Fabra vek hi minute 6-na leka Colombia si phurh suttu niin minute 73-naa Marlos Moreno goal khungin awmzia a nei thui tawh lo - Copa America aṭangin Costa Rica an tla.