Ireland assistant manager ni zel tur Keane

Kar hmasa lawka Republic of Ireland manager Martin O'Neill nena kum hnih dang Ireland enkawl tura contract thar ziaktu Roy Keane chuan an ram team enkawl zel tura thu-tlukna a siam chu a in-chhir loh thu a sawi.

Kum 44-a upa player rorum ṭhin chuan, "Martin nen Ireland kan enkawl chhunzawm zel thei tur hi kan hlim em em a, players, staff leh kan hotute an vaiin thawhpui an nuam em em vek a ni," a ti.

Tun hnaiah club enkawl a châk thu a sawi avang-in Keane thutlukna hian mak tih a hlawh a, zanin dar 9:30-a Euro 2016-a an match hmasa ber Sweden nen an khelh tur urlawk nana press conference an neihah a contract chung-chang Keane hi zawh a ni.

Mahse, Roy Keane chuan, "Ka contract chung-changah inbuaina tur a awm lo. Eng pawl tan nge in thawh a? engzat nge in hlawh? engtia rei nge i cham dawn? tih hi ka buaina tur a ni lo. Chutiang chiah chuan ka deal chungchangah buaina tur in nei lo," tiin journalist-te a chhang a ni.