Euro 2016 England an vanduai; mumang ramah Wales

European championship-a an match hmasa berah a vawi khat nan England-in chak tum hle mah se Eric Dier hmanga an goal hmahruai an hum zo lo a, hun pek belha Vasili Berezutski tauh goal vangin Russia nen 1-1 in an inhnehtawk.

Kum 58 hnua inelna lianthama a vawi khat nana inlan Wales erawh mumang ramah an cheng chhun-zawm zel - Chris Coleman-a naute hian Gareth Bale-a freekick leh Hal Robson-Kanu goal hmangin Slovakia chu 2-1 in an hneh.

England an hmuhnawm

Inkhel ṭantirh aṭangin England an hmuhnawm a, goal an khung erawh minute 73-naah chiah a ni. Tottenham midfielder Eric Dier chuan yard 20-a hla aṭangin freekick a pet goal a, Russia goalkeeper Igor Akinfeev tan tih theih a awm lo.

England manager Roy Hodgson a hlauthawng hma hret a, midfield-a tlarhma pui ṭha tak Wayne Rooney chu goal an khung aṭanga minute linaah la chhuakin Jack Wilshere a luhtir.

Arsenal midfielder hliam dam-kawr lutin awmzia a nei thui lo a, goal venhim tum England-in goal an chhuah - minute 92-naah Vasili Berezutski chu amah vengtu Danny Rose aia sangah zuangin ball a tauh a, England keeper Joe Hart-a'n tih theih a nei lo.

Rooney a pangngai reng

Inkhelh ṭan a nih hmaa sawi hlawh ber chu Wayne Rooney a ni. England captain hi Roy Hodgson-a'n midfield-ah chhawr a tum thu a sawi a, Manchester United striker hi a khelh ṭhinna position-ah a ṭha tawk tawh lo a nih chuan France-a hruai kher a ṭul loh thu media tam takin an tlangaupui.

Mahse, Rooney-a'n hmana a thiamna ang kha a la nei reng tih khelmual chhungah pholangin midfield-ah ro a rel a, vawi 55 zet pass neiin 86% a pass dik.

England tlarhnung a puih ṭhat tluk zetin tlarhmaah a nawr na a, a goal shot ṭha tak Russia keeper Akinfeev-a'n post-a a lo nam per hman chu pui tak a ni. Hei erawh theihnghilh loh a ṭha - Russia hian England an ngam lo hrim hrim a, players tlan chak rual awmna Wales an hmachhawn hunah Rooney dinhmun diktak a hriat ang.

Hodgson a lawm lo

England manager Roy Hodgson chuan, "Minute khat chiah hun tawp nan a awm tawh tihah goal kan chhuah a, kan tan chuan a na a ni. Ka nauten an khel ṭha takzet a, chak tura inbuatsaih kan nih avangin tuna kan result-ah hi chuan chak lo ang mai niin ka inhria," tiin an result-ah lawmna tur a neih loh thu a sawi.

England captain Wayne Rooney chuan, "Kan khel ṭha a, mah se kan hun neih kan chhawr lo a ni. Kan chak zawh loh avangin kan ngui a, mah se minute 90 chhung ṭha taka kan khelh avangin kan lawm tur a ni," a ti.

Wales tan Bale

Gareth Bale-a'n Wales tan in-nghah-na tlak a nihzia pholang nawnin Slovakia lakah freekick hmangin Euro-a an ram goal hmasa ber a khung a, mumang ramah Wales a chenpui zel.

Inkhel ṭantir lamah Slovakia an hlauhawm zawk a, Marek Hamsik chuan hun ṭha a nei nghal. Napoli playmaker hian player thiam bik a nihzia pholangin Wales tlarhnung a ṭhiah hnuah goal-ah pet mah se Ben Davies chuan goalline aṭangin ṭha takin a lo pet chhuak a - Wales an vannei.

Minute 10-naah Wales-in free-kick an hmu a, a pet turin Gareth Bale a lo ding chhuak. Real Madrid forward hian an freekick hlawhchhuah hi goal-ah a chantir a, ball kal dan hisap sualtu Slovakia goalkeeper Matus Kozacik chu dem theih tak a ni.

Euro qualifier-a Spain hnehtu leh 2010 World Cup-a Italy lo hnawt chhuak tawhtu Slovakia-in minute 61-naah Ondrej Duda hmangin an si phurh sut mah se Wales-in substitute Hal Robson-Kanu hmangin minute 81-naah goal dang an khung leh a, inkhel hmuhnawm takah 2-1 in an chak.

Coleman a zam lo

Wales manager Chris Coleman chuan, "Tumah kan hlau lo - kan nihphung hi kan hloh lo a nih chuan kan duh hlawh chhuak turin kan ṭha tawk. He hun hi rei tak kan lo nghak tawh a, min ṭawiawmtute tana a nawm tur zia hi ka hriatthiam pui a ni. Kan hmaah engmah hlauh tur a awm lo, a chang chuan kan hriat miah lohte hi kan hlau mai mai a ni - kan hmachhawp tih zel mai hi kan hna chu a ni," tiin huaisen taka an kal chhunzawm zel tur thu a sawi.