Saina champion ve ta

Indian badminton star Saina Nehwal chuan kumina a champion-na hmasa ber ni turin nimin tlai khan Australian Open Super Series nomawi a chawi.

Sydney Sports Centre-a inkhel-ah world number 1 hlui Saina hi awlsam takin a chak mai bik lo a, darkar khat leh minute 11 chhungin 11-21, 21-14, 21-19 in hnehna a chang. Kum 2014-a a lo hlawhtlin tawhna hmun a nih avangin he hmuna vawi hnih champion thei hmasa ber a ni hial.

London Olympics bronze medallist Saina hi Australian Open-ah hian a khel ṭha hle a, quarterfinal leh semifinal-ah world champion pahnih Ratchanok Intanon (2013) leh Yihan Wang (2011) te a lo hneh tawh bawk.

August thla a neih tur Rio Olympic-ah India chuan player pasarih a tir thei dawn a, infiamna khawmpui lian neih dawn hnaia world number 8 Saina-i'n hlawhtlinna a chang hian India beiseina a siam thar hle.

Mipa single lama India thiampuipa Kidambi Srikanth erawhin final a lut zo lo a, Inrinni khan Hans-Kristian Vittinghus nen minute 43 an inbeih hnuah 20-22, 13-21 in a chak lo zawkah a ṭang ta a ni.