Champion lai Spain inlan zan
European Championship-a champion lai chu Spain an ni a, zanin dar 6:30 hian Stadium Municipal, Toulouse-ah Czech Republic an hmachhawn ang.
Group D inkhel dangah nizan khan Turkey leh Croatia an inkhel a, result erawh kan hre hman lo.
De Gea Vs Casillas
Kum 25-a upa David De Gea hian field pawnah buaina a nei a, kum 2012 daih tawh khan ram tana a khelhpui Iker Muniain leh player dang pakhat (Isco?) hmeichhe chunga mawi lo taka an chet theih nana ruahmanna siamtu nia puh a ni.
Spain chanchinbu lar Marca-in mipui ngaihdan a laknaah De Gea hi starting eleven-a duhtu 72% zet an awm a, amaherawhchu Manchester United keeper mualpho hnu hi chuan Iker Casillas duhtu 54% an awm tawh thung.
Spain boss Vicente Del Bosque chuan, "De Gea hian field pawn lam hi a theihngilh vek thei ang. Amah hi a naupan anga en chi a ni lo a, Casillas nen training ṭha takin an nei a, player dang zawng zawngin an ṭan tlat bawk," tiin United keeper chungchang a sawi.
Field pawn buaina vang hian De Gea hi an thawn haw tih thuthang a awm hman a, amaherawhchu Spain boss hian United keeper hi thawn haw tura ngaihtuahna an la put chhin loh thu a sawi bakah Atletico Madrid keeper hlui hian an puhna hi a pha bawk.
Spain hian friendly match hnu-hnung berah Georgia 1-0 in an hneh lo a, hemi ṭuma keeper chu De Gea a ni. Kum 65-a upa Del Bosque hian keeper pahniha a chhawr zawk tur la puang lo mah se field pawn buaina a awm hmain thutlukna a siam tawh thu a sawi.
Vawi thum champion?
Spain hi European Champion-ship-ah a zawna vawi hnih champion thei hmasa ber an ni a, tun ṭuma an champion leh theih chuan an record neih sa hi an khum leh dawn tihna a ni.
La Roja hian player an nei ṭha a, thlan loh zingah Santi Cazorla, Saul Niguez, Isco, Juan Mata, Diego Costa, Fernando Torres leh player lar an awm nual. Amaherawhchu tun
ṭum squad hi Euro 2012 an champion ṭum ai khan an ṭha lo zawka ngaih a ni a, 2014 FIFA World Cup-ah group stage an paltlang zo lo tih hriat tel a ṭha bawk.
Spain forward Aritz Aduriz chu kum 35-a upa a nih hnuah inelna lian tham khel turin koh a ni a, Celta Vigo striker Nolito leh Juventus striker Alvaro Morata te nen hming langsar ber chu ni lo mah se anmahni vanga an koh loh thlirin an chhe lo ang.
La Roja chungnung bik lo
Spain leh Czech Republic hi European Championship-ah la intawng lo mah se qualifier-ah vawi ruk inhmachhawn tawhin Spain vawi ruk an chak a, Czech hi vawi hnih an chak thung.
Friendly match zawng zawng nena an inkhelh tawh zat chu vawi 16 a ni a, vawi sarih ve ve chakin vawi hnih an inhnehtawk. Czech hian keeper ṭha Petr Cech an nei a, Tomas Rosicky an kawl bawk avangin Spain barakhaih ve thei an ni.