MFA-in Jeje Lalpekhlua a chawimawi

"Ka awmna hmun apiangah Mizoram tan ka theihtawp ka chhuah ṭhin," titu Jeje Lalpekhlua chu a phu ang ngeiin Mizoram Football Association chuan June 11 khan Aijal Club-ah a chawimawi.

He hunah hian Mizo footballer langsar tak tak bakah Mizoram chhunga pawl hrang hrangte chuan Jeje-a hi lawmpuina thilpek an hlan.

Chawimawina inkhawm kaihruaitu MFA honorary secretary Lal­nghing­lova Hmar chuan Jeje an chawimawi chhan sawiin, "Jeje-a hlawhtlinna hian lawmpui a phu a, Mizo naupang tam zawk tan hei hi chona ni se kan duh bawk avangin Mizo tihmingṭhatu Jeje hi kan chawimawi a ni," a ti.

Jeje-a hlawhtlinna

Season hman zawh tak bikah kher kha chuan India ramah Jeje-a tluka chawimawi phu an awm lo ang - Hnahthial tlang­val hian inelna hrang hranga match 44 inkhel bul a
ṭanah goal 32 a khung a, a goal khung kawngah record a siam nual bawk.

Federation Cup bikah goal riat khungin Fed Cup season khata goal khung hnem ber a ni a, goal sarih lo khung tawh Baichung Bhutia leh Brazilian striker Jose Ramirez Barreto-te record a khum.

AFC Cup-ah goal ruk a khung a, Indian player zinga season khata khawmualpui inelnaa goal khung hnem ber a ni.

India tan vawi 36 a inlana goal 15 khung tawh Jeje Lalpekhlua'n ISL-ah Chennaiyin FC tan nomawi a chawi hnuah, I League-ah Mohun Bagan pahnihna a nihpui a, Federation Cup-ah a champion-pui bawk a, AFC Champions League Qualifier-a Indian club chak hmasa ber a nihpui a, AFC Cup-ah last 16 hruai thlengin India chu SAFF Cup-ah a champion pui bawk.

ISL-ah Emerging Player of the League a ni a, FPAI Indian player of the year chu tuma chuh phak rual lohin Jeje-a kutah hlan a ni. India U19 leh U22 captain lo ni tawh Jeje hi 2018 FIFA World Cup Qualifier-a India-in Iran leh Turkmenistan an hmachhawn ṭumin captain a ni a, Mizo zinga India captain hmasa ber a ni.

Zin kawng a thui!

Footballer langsar ni tura Jeje-a kalkawng a awlsam bik lo.

Jeje-a pa F. Liankima chuan thu sawiin, "Jeje hi rilru chak a nih loh avangin lehkha zir kawngah harsatna tam tak a nei a, chuti chung chuan tlaivar ṭhaka lehkha pawh zir mai ṭhin a ni. Football hmanga eizawn a duh thu min hrilh a, pawl 10 tal a pass a ngaih thu ka hrilh," tiin Jeje-a football zinkawng inṭan dan a sawi.

Jeje hian HSLC a pass hnuah Aizawl panin Benjamin Football Academy, Venghnuaiah bul a ṭan a, Dinthar FC tan a khel zawk bawk.

Mizoram aiawha a fehchhuahna hmunah club sawmtu nei ṭhin mah se a zawm lawk duh lo a, India Under 19 camp-a a awmlaia amah sawmtu Pune FC tan a professional contract hmasa ber a ziak.

Defender to striker

F. Liankima chuan a fapa chu football a khelh ṭan tirhin defender-ah bul a ṭan thu a sawi. Jeje-a pa chuan, "Defender-ah bul ṭanin tharum a ngah em em mai a, Serchhipah U16 inkhela a kal ṭumin defender ni chungin top scorer a ni a, a chak bik em avangin tournament huaihawttu ten 'lo kal tir ve tawh suh u' min ti hial a ni," a ti!

Jeje-a'n kaihruaitu a nei ṭha a, a pa nau Lianhmingthanga chu a hunlaia Mizoram footballer lar a ni. Jeje-a patea hi defender aṭanga striker position-a khel tura fuihtu a ni.

Jeje hi a naupanlaiin tennis, table tennis, badminton leh boxing-ah talent a nei ṭha a, an khuaa a thiam pawl a ni phak a; nimahsela a pa hian football-a kal turin a kawng a thlansak a ni.

Jeje pa chuan, "Keini chuan football zirna lamah chhuan tur kan nei lo a, MFA hi Jeje-a engkima engkim an ni a, amah chher liantu leh tun dinhmun thlentirtu an ni," tiin MFA chungah lawmthu a sawi.

Jeje a lawm

MFA-in a puala hun an hman avangin Jeje a lawm a, Mohun Bagan striker chuan Vanglaini palai hnenah, "MFA-in hetianga mimal chawimawina a pek hmasak ber ka ni hi ka lawm takzet a, phu lo ka intih rualin he chawimawina dawng thei tura hriselna ṭha leh chakna min petu Pathian hnenah lawmthu ka sawi a ni. He dinhmun ka thlenna hian chona nasa zawk min siamsak a, hmasawn zel tura min fuihtu ṭha tak a ni," a ti.

Mizo mipuite hnenah lawmthu sawiin, "Pathian khawngaihna zarah khawvel hmun hrang hrangah inkhelin kan kal kual a, kan kalna apiangah Mizo min ṭawiawmtu an awm zel a, ka lawm takzet a ni. Mizo mipuite ṭawng-
ṭainain vawiin hi min hruai thleng tih ka hria a, ka footballer puite nen hian in-
ṭawngṭai puina kan mamawh zel dawn a ni," tiin inngaitlawm takin a sawi.

Season tharah Jeje hian Indian Super League-ah Chen­naiyin FC tan bawk a khelh chhun­zawm tur thu Vanglaini palai a hrilh.

Mama'n a lawmpui

Jeje-a chawimawina inkhawmah Mizo footballer langsar engemawzat an tel a, heng zinga langsar pawl chu Mizo-te tana professional zin kawng sialtu S. Malsawmtluanga a ni.

Mizoram legend Mama chuan, "Jeje hi ka mumang ramah a cheng mek a, kei ni tan chuan a thlen chin hi a sang lutuk a, khaikhin chi pawh kan ni lo. Mizo tlangvalin thleng thei se tia duhthu ka lo sam tawh zawng zawng kha Jeje-a hian a takin min hmuhtir a, chawimawi hi a phu takzet a ni," tiin Jeje-a lawmpui thu a sawi.

MFA secretary Lalnghinglova Hmar chuan, "Mama hian Mizo tlangvalte tan kawng a sat eng a, an thlen phak loh a thleng. Hemi hnuah Jeje-a'n Mama-te thlen phak loh a thleng a, Jeje-a thlen phak loh thleng tur Mizo tlangval dang kan mamawh belh a ni," tiin Mizo
ṭhalaite tan chona a siam bawk.

MFA aiawha thusawitu Tuikhuah­thanga, Treasurer chuan Jeje bakah David Lalrinmuana (Aizawl FC) chu Indian Player of the Year nominee-ah a tel thu a sawi a; Mizo player lawm­man sang dawngtu mi tam zawk awm zel se, Jeje anga chawimawi tur neih belh zel a duh thu a sawi.

Hmingsanga'n Jeje chanchin leh football-a a thil tawnte a sawi a, mi ṭha­-
hnem takin thilpek an hlan.