Zanin dar 8:00-ah T20 Cricket World Cup final : India vs South Africa

T20 Cricket World Cup final chu zanin dar 8:00 hian Kensington Oval, Barbados-ah India leh South Africa ten an khel dawn. Men in Blue hi kum 2007-a South Africa ram ngeia T20 World Cup nomawi an chawi hnuah an la champion leh lo a, Proteas erawh tun ṭum hi final an khelh hmasak ber a ni thung.

Proteas leh Men in Blue te hian tun ṭum inelnaah hneh loh an la tawng lo ve ve a, che ṭha pahnih an inhmachhawn dawn avangin 'final duhthusam' ti hiala sawi ngam a ni.

Kohli hun?

Cricket World Cup ṭan hmain Virat Kohli a langsar a, inelna ṭan hnuah erawh a chet ṭhat miau loh vangin a chanchinin sawi a hlawh lo hle. India captain hlui Kohli hian match sarih a khel tawh a, a run siam zat belh khawm chu 75 runs chauh a ni.

Kohli khelh ang hian player dang chu khel ve ngat se, an awltir daih tawh ang. Mahse, Kohli erawh player danglam bik a nih avangin ngainatu pawh a ngah hle. Kohli hi beisei angin la khel ṭha lo mah se final-ah chakpui tham runs a siam phawt chuan; group stage, super 8 leh semifinal-a a chet chhiatna zawng zawng chu an theihnghilh sak ang.

Engtin zel?

Chutihrualin Kohli hi che ṭha lo chhunzawm pawh ni se, India hian innghahna tur ṭha an nei. Rohit Sharma, Rishabh Pant, Suryakumar Yadav leh Hardik Pandya te run siam turin an awm a, a vawmtu lamah Jasprit Bumrah, Axar Patel leh Kuldeep Yadav te chu innghahna tlak an ni.

Captain Rohit Sharma chuan, "Virat hian theihna sang tak a nei a, kum 15 chuang a khelh tawh chuan hetiang harsatna hi an tawk vek a, buaina tur a awm lo. Final atan a inkhek khal pawh a ni thei ang," tiin Kohli chunga rinna an nghah zel tur thu a sawi a, final-ah pawh inkhel hmuhnawm tak chhawpchhuah an tum thu a sawi bawk.

Proteas hun?

South Africa hian final an khelhna hmasa berah champion ngei an tum dawn a, tun ṭum inelnaah an khingpui an hneh vek avangin inrintawkna pawh an ngah khawp ang.

Opener Quinton de Kock-a'n semifinal-ah run nga chauh siam mah se inelna a hmang ṭha. Man of the match-ah ṭum hnih thlan a ni a, thlan a nih ṭum hian half century a siam ve ve. De Kock thlawp tur hian Reeza Hendricks, captain Aiden Markram, Heinrich Klassen leh David Miller te an awm.

India ang thoin batter aiin bowler an nei ṭha emaw tih theih an ni. Marco Jensen, Kagiso Rabada, Anrich Nortje leh Tabraiz Shamsi te an kawl a, India batter-te an fimkhur a ṭul khawp ang.