Champion lai England ngamtu India

India-in captain innghahna tlak Rohit Sharma an nei a, T20 Cricket World Cup semifinal-ah champion lai England chu 68 runs-in an hneh. Men in Blue hian bat hmasain 171/7 runs an siam a, England hian 103 chauhin an chhanglet a, over 16.4-ah an thi fai vek.

Captain ṭha mi

Semifinal hmasa zawkah bat hmasak zawk a fuh lo a, Afghanistan-in anmahni duh thlanna ngeiin an vaw hmasa a, South Africa-in an sawp. Guyana-ah England captain Jos Buttler-a'n vawm hmasak a thlang a, ṭhumvawra vanduai India tan hna a hautak dawn.

Ruahsur vangin inkhel a hunah ṭan theih a ni lo a, over tih tlem erawh a ngai lo thung. Ṭum dang ang thoin Rohit Sharma leh Virat Kohli te an inkawp a, Kohli hian run kua chauh a siam bakah a thlaktu Rishabh Pant-a'n run li chauh a siam.

Rohit-a chungah mawhphurhna tla a, Suryakumar Yadav-a'n a rawn thlawp ṭha bawk. Batter ṭha pahnih an inkawp ṭha a, an chet ṭhat chhoh lai taka ruah a rawn tla leh chungin Rohit-a'n half century (57) a siam hman a, SKY pawhin 47 runs a siam.

Hardik Pandya (23) leh Ravindra Jadeja (17*) ten India dinhmun rawn siam ṭha zelin Shivam Dube 'golden duck' mah se Axar Patel-a'n 10 runs rawn belh lehin over 20-ah 171/7 runs an siam a, a chhe hran lo.

India inngahna bowler

Tun ṭum T20 World Cup-a India ṭhatna chu, ṭum dang ang lo takin batter chauh ni loin bowler an nei ṭha - bowler-te hi danglamna thlentu an ni mah zawk. England lakah pawh India bowler-te an che ṭha leh a, inelna hmang ṭha Phil Salt (5) chu run tam a siam hmain Jasprit Bumrah-a'n a vawm hlum.

Captain Buttler rawn che ṭhain ball 15-ah 23 runs siam mah se Axar Patel hmaah a thamral. Gujarat tlangval Patel hian Moeen Ali (8) leh Jonny Bairstow (0) te vawm hlum lehin, India dinhmun a ṭhat phah hle.

Kuldeep Singh pawhin a hna a tlin a, Sam Curran chu run hnih lek a la siam tihin pavillion-ah a thawnkir a, Harry Brook (25) pawhin Kuldeep tho a ngam lo. Over 11 a zawhin England-in 68 runs chauh an la siam a, wicket ruk an hloh tawh avangin chak theihna kawng a inhawng zim ta hle.

England tan chak beisei ngam chi a ni tawh lo a, over 20 an hman tluan theih nan fimkhur taka an bat a ṭul ta zawk. Mahse, Kuldeep a che ṭha zel a, Chris Jordan pawhin run khat lek a siam. Liam Livingstone (11) leh Adil Rashid (2) te an run out a, over 16-na khelh zawhah Three Lions-in wicket kua an hloh tawh a, 100 runs chauh an la siam.

Jasprit Bumrah a rawn lang a, over 17-naah Jofra Archer vawm hlum lehin England-in 103 runs siamin an thi fai vek. Three Lions an mualpho a, India lakah 68 runs-in an tlawm. Men in Blue-in T20 World Cup 2022 semifinal phuba an la thung.