Euro 2024 Last 16 : Zanin dar 12:30-ah Germany vs Denmark

UEFA Euro 2024 last 16 chu zanin aṭangin khelh ṭan a ni dawn. Zanin dar 12:30 hian inelna thlengtu Germany-in Signal Iduna Park-ah Denmark an hmachhawn ang.

Starting XI thar

Julian Nagelsmann-a'n group stage-ah starting eleven ngai vek a hmang a, hrem vanga centre back Jonathan Tah a khelh theih dawn loh avangin last 16-ah starting eleven thar hman a ṭul dawn. Borussia Dortmund fachuam Nico Schlotterbeck chu Antonio Rudiger kawppui tur a ni a, Signal Iduna Park-ah a mikhual lo ang.

Schlotterbeck chuan, "Attacking leh defending-a kan awm dan tur kan chiang vek tawh. Rudiger nen hian Germany tan kan khel ho fo tawh a, buaina kan nei lo ang. Ke vei lamin ball ka pet a, hei hi ka danglamna tur a ni," tiin a sawi a, Germany-in defence laiah ke dinglam (Rudiger) leh ke veilam (Schlotterbeck) hmang an inkawptir thei dawn a ni.

Fullkrug hi...

Germany-in Scotland (5-1) leh Hungary (2-0) hnehin ṭha takin bul an ṭan a, group match hnuhnung berah erawh Switzerland 1-1 in an draw hram. Bench aṭanga lut Niclas Fullkrug-a'n injury time-ah siphurh sutna goal a tauh lut a, Dortmund striker hian Scotland lakah goal a khung tawh bawk.

Julian Nagelsmann-a'n inkhel bul ṭan tur la tichiang lo mah se German media ṭhenkhat chuan Fullkrug hi Kai Havertz aia bul ṭan tur angin an ziak a, thil ni thei tak a ni.

Chutihrualin player dang erawh khawih chet an ni lo ang. Jamal Musiala, Florian Wirtz, Toni Kroos leh Ilkay Gundogan ten an theihna anga an khel a nih chuan Germany-in football hmuhnawm leh mawi an pho chhuak leh ang.

Denmark hi...

Denmark hi group stage-ah an chak miah lo a, chutihrualin an tlawm miah lo bawk. Kasper Hjulmand hote hi Slovenia (1-1), England (1-1) leh Serbia (0-0) te nen an inhnehtawk vek.

Danish Dynamite tan Christian Eriksen a la hmuhnawm reng a; Jonas Wind leh Rasmus Hojlund te hi defender tan an hnawksak a, goal erawh an la khung lo thung.

Denmark coach Kasper Hjulmand chuan, "Kan tactic kan ringtawk. Team chhe zawk kan ni tih kan in pawm a, mahse hei hi Germany pressure pek nan hman kan tum ang. A tir aṭangin rilru fim takin khelh kan tum ang a, kan theihna zawng zawnga khelh kan tum ang," tiin a sawi.

Euro 1992 khan Denmark hian final-ah Germany hnehin an champion a, hemi ṭum pawh hi chak lo tura ngaih an ni. Tun ṭumah pawh hian inelna thlengtu Germany hi chak tura rinkai zawk an ni a, chutihrualin football-ah chuan eng result pawh a thleng thei thung.

Chutihrualin Denmark tana Germany hneh tur chuan England an khelh ṭum anga ṭhaa an khelh chhuah a ṭul dawn a, tlarhnung an rem phui ṭhat a pawimawh bawk ang.

Inlan tura beisei

Germany: Neuer; Kimmich, Rüdiger, Schlotterbeck, Mittelstädt; Andrich, Kroos; Musiala, Gündoğan, Wirtz; Fullkrug

Hrem : Tah

Denmark: Schmeichel; Andersen, Vestergaard Christensen; Kristiansen, Nørgaard, Eriksen, Højbjerg, Bah; Højlund, Poulsen

Hrem : Hjulmand