England, tho la ding ta che - i hliam a dam e?

Match thum aṭangin point nga an hmu a, tlawm an nei lo. Mahse, England an ni miau a, an chungah beiseina a sang - last 16 an lut chungin sawisel an ni a, group hmahruaitu an ni chungin fan-ten an sawisel!

England hi ṭul loah pressure an insiam mai mai em ni aw, tih theih a ni a, television pundit thlenga na taka an ṭawng avangin captain Harry Kane phei chu a ṭawng chhuak hial - an ngawih phah lem hlei lo a.

Three Lions hian Pathianni zan dar 9:30-ah Slovakia an hmachhawn dawn a, Euro 2024 last 16-a team nem pawl nia ngaih an hmachhawn dawn avangin fans beiseina a sang ang tih a chiang a, chak mai ni loin, inkhel hmuhnawm hmuh tel an beisei dawn.

England hian last 16 lut turin match hmasa berah Serbia chu 1-0 in an hneh a, hemi hnuah an chak leh tawh lo. Denmark (1-1) leh Slovenia (0-0) an inhnehtawkpui a, fan-ten hei aia ṭha zawk an beisei.

Tho ru le!

Euro 2024-ah England tan champion kalkawng thui takin a inhawng - last 16-ah Slovakia an hmachhawn dawn a, final hmaa an hmachhawn theih zingah Italy leh Netherlands chu team huphurhawm langsar deuh an ni. Team pahnih hi anmahni ang thoa Euro 2024-a beisei phak lo an la ni zui.

England kalkawng lo lama awm ho hi en ila, an hraw hle - Germany, Spain, France, Belgium leh Portugal te an ni a, seeded team vek an ni! Seeded team paruk zinga panga chu knockout kalkawngah an awm ho a, England an tla fal tihna a ni.

A tawi zawnga sawi chuan a awlsam thei ang berin Three Lions tan kawng a inhawng a, he chance hi an bawhpelh a nih chuan Gareth Southgate leh a player-te hmakhua a thim khawp ang - a bik takin Southgate tan chuan puanthuah tel a, hna dang zawn a ṭul ngeiin a rinawm.

Golden Generation tia hminglem an vuah ho meuh pawha nomawi chawi lo England fan-ten beiseina sang tak an nei a, Steven Gerrard, David Beckham, Frank Lampard leh Wayne Rooney te ho tih theih loh kha Harry Kane, Jude Bellingham leh Phil Foden te hoin tih an tum dawn e.

Foden a kir

Nilaini zan khan Phil Foden-a'n England squad chhuahsanin, an ram lamah a haw zuai a, a kawppuiin an fa pathumna tur a hrin vang a ni - a tirah chuan Pathianniah chauh squad zawm leh tur anga sawi a ni a, mahse, Ningani khan Manchester City midfielder hian squad a zawm lehnghal.

Heti a nih chuan Foden hi bul ṭan lehnghal tura beisei a ni a, chawlh hahdamna hun pek a nih pawhin luh chaka tha za zek zek Cole Palmer a awm avangin England tan buaina tur a awm lo - a nihna takah chuan Foden hian tun inelnaah beisei a phak lo a, awm lo pawh ni se, fans tam tak chuan Palmer-a tan chance ṭha a nih dawn avangin pawi an ti lo zawk hial mai thei.

Hetihlai hian Three Lions tan Declan Rice leh Kieran Trippier ten Ningani khan training an zawm thei lo a, a hranin training an nei. Media ṭhenkhat chuan hliam vang ni loin, team lam ruahmannaa a hrana training mai an nih thu an sawi.

Three Lions khelh chhiat hi a êng zawnga thlir theih dan a awm - player pahnih hi inlan thei lo pawh ni se, team-ah danglamna an thlen tam loh avangin thlak an harsa lo ang!

Engtin nge England?

Southgate-a'n 4-2-3-1 a hmang kum hlun a, Pathianni zanah a thlak thut a rinawm lo. Chuti a nih chuan tlarhnungah Jordan Pickford-a'n si ban a nghak leh ang a, Kyle Walker, John Stones leh Marc Guéhi te chu inlan tur chiang an ni a, Trippier luh dawn leh dawn loh a chiang lo.

England boss Southgate-a'n player dam ṭha a nei reng chungin Manchester United left back inhliam Luke Shaw hruai a thlang a, tun thlenga a la dam chian loh avangin Newcastle United right back Trippier hian left back mawhphurhna a chelh - hetiang boruak karah hian Aston Villa centre back Ezri Konsa chuan left back-a a khelh theih thu a sawi.

Mahse, Trippier hi inlan lo ta pawh ni se, Konsa ai chuan Liverpool right back Trent Alexander-Arnold chuan left back mawhphurhna a chelh a rinawm zawk. Arnold hi a tirah midfield-a chhawr a ni a, mahse, an match hnuhnung berah chuan bench-ah awmin Conor Gallagher a lut.

Gallagher-a'n England midfield buaina a chingfel phak lo a, Manchester United rawlthar Kobbie Mainoo luh hnuah an zia hret - zaninah Rice a inlan hram tura beisei a ni a, Mainoo nen hian an rawn inkawp a nih pawhin mak ti suh.

Duhthlanna dang

Southgate-a'n midfield siksawi theih dan dang a nei a, huaisen erawh a ṭul. Real Madrid thiampuipa Jude Bellingham-a'n number 10-ah beisei a phak lo a, Real tana goal khung thei tak kha a ni ta lo em ni chu aw, tih mai tur a ni - Spanish club-ah pawh pawh hnun a nih chang a awm a, Southgate hian pawt hnung ngam se, Foden-a'n zalenna zau zawk a nei thei ang.

Tun dinhmunah chuan La Liga player thiam ber leh Premier League player of the season hi an indip deuh em ni chu aw, tih theih a ni. Chutihrual chuan zin chauh vangin Foden hi inlan lo thei a ni a, Slovenia laka bench aṭanga luhtir, nung ṭha tak Palmer tan chance ṭha a ni thei.

Captain Harry Kane-a'n taimak a chhuah lehzual a ṭul a, 'leader' a ni tih a lantir a ṭul bawk - beisei anga khelh chhuah loh leh team talbuai changin, Three Lions hian fuih phurtu, hruaitu ṭha an nei lo niin a lang a, armband hren ringawt lo deuhin hruaitu a nihna Kane hian a lantir a ṭul.

Kum 22 mi Bukayo Saka pawh hmasawn a ṭul a, a khelh danah lawmna tur a awm rih lo - a tawi zawnga sawi chuan vawi khat tihsual hi puanthuah telna a ni tawh a, England tan tun hi thawh hun a ni a, an tho lo a nih chuan Germany an mangṭha thei ang.

Slovakia an phur

Euro 2020-ah Slovakia-in group stage an paltlang lo a, World Cup 2022 an khel phak lo zui. Mahse, Euro 2024 a her chhuah meuh chuan group stage an paltlang a, last 16-ah England an hmachhawn dawn avangin an phur hle - an zuam ve tlat!

Slovakia Under-21 coach Adrian Gula chuan, "England hi team ṭha tak an ni a, mahse, tun inelnaa an khelh dan enin last 16-a tum ka châk a ni," a ti a, Slovakia international hlui Adam Nemec chuan, "An khel chhe em em a, chu chu kan chhawr thei ang," a ti - England fans-in ngaihthlak nuam an ti lo ang.

Newcastle leh Slovakia goalkeeper Martin Dubravka chuan, "England hi ka chenna leh league ka khelhna hmun a ni a, anni hmachhawn hi ka châk," a ti a, Spain emaw England emaw tum thei dinhmuna an din lai khan winger Lukas Haraslin chuan, "England nen hian tun hnaiah kan inkhel lo a, anni hmachhawn hi ka châk. Spain hi chu Euro 2020-ah khan kan tum a, 5-0 in a tawp tih kan hre vek," a ti!

Slovakia hian player langsar bik sawi tur nei lo mah se, an match hmasa berah 1-0 a Belgium hneh thei an ni a, Ukraine lakah 2-1 in tlawm mah se, Romania (1-1) an inhnehtawkpui leh bawk a, England tan zuam sual theih an ni.