Murray a chiang thei lo

Wimbledon khelh ṭan hmain ni tam a awm tawh lo - July 1 aṭanga khelh ṭan tur grass court inelna lianah hian Andy Murray hian a inlan thei dawn nge dawn lo tih a la sawi chiang thei lo.

Kum 37 mi Murray hian tennis a khelh hun chhunga a season hnuhnung ber tura ngaih a hmang mek a, a tan Wimbledon a khelh tawpna a ni tawh ang, a inlan lo a nih chuan British miten an ui zual ngei ang.

World number 1 hlui Andy Murray-a thupuangtu chuan, "Andy hi kuminah hliam vangin a buai fo a, a hnungzâng zaina pawhin tunah chuan hma a sawn ve zel, kan tan chuan a dinhmun tichiang turin hun a la ngai," a ti.

Britain tlangval Murray hian a vanglaiin Wimbledon title hi vawi hnih a la a, an ram tan Olympic gold medal a vaw chhuak bawk a, an rama mi hmingṭhate chawimawina 'Sir' nihna pawh an hlan a ni.