Italy hmaa ding tur Switzerland

Euro 2024 last 16 match hmasa berah Italy leh Switzerland an inkhel dawn a, zanin dar 9:30 hian Olympiastadion Berlin-ah an inhmachhawn ang. Azzurri hi 'group of death' aṭanga tal chhuak thei an ni a, Rossocrociati hi inelna thlengtu Germany chelh theitu an ni thung.

Switzerland hian group stage-ah hneh loh an tawng lo a, Germany lakah hun rei zawk hmahruaitu ni mah se injury time-ah an ṭang tluan thei ta lo. Swiss captain Granit Xhaka chuan, "Hna hmasa chu kan zo tawh a, second round kan khelh hunah chuan kan khingpuite pawhin min zah sawt tawh ang," tiin a sawi a, group stage an khelh danah a lungawi.

Rossocrociati hian Euro C'ship-ah zawnin vawi thum group stage an paltlang ta a, vanneih vang ngawt ni lo - an ṭhat vang a ni. Italy hmachhawn hunah hrem vangin right back Silvan Widmer an chhawr thei dawn lo a, player dang erawh an inlan thei vek dawn.

Yann Sommer, Manuel Akanji, Fabian Schar leh Ricardo Rodriguez te awmna a nih avangin Switzerland tlarhnung a phui ṭha a, Bayer Leverkusen midfielder Xhaka-a'n midifield a ho thei bawk. Tlarhmaah Dan Ndoye leh Breel Embolo te an awm a, Germany an hmachhawn ṭumin Ndoye hian tlarhnung a tibuai fo tih hriat a ṭha.

Italy hi an ṭhat ber ṭum chu a ni hauh lo a, chutihrualin champion lai an ni tih hriat a ṭha. Knockout inelnaah chuan goalkeeper ṭha neih a pawimawh a, Gianluigi Donnarumma hi danglamna a ni thei ang. Group stage-ah pawh PSG keeper Donnarumma hian penalty aṭanga Luka Modric goal khung tur a dang.

Mahse, Italy hian group match-a khel kim vek defender Riccardo Calafiori chu hrem vangin an chhawr thei dawn lo a, Bologna defender hi Euro 2024 group stage hmang ṭha ber zinga mi a ni.

Luciano Spalletti hote hian last 16 lut turin vanneihna an mamawh a, injury time-ah pawh minute riatnaa substitute Mattia Zaccagni-a'n goal khungin Croatia nen 1-1 in an inhnehtawk. Croatia laka hun tawp lama an khelh dan anga huaisen taka an khelh chhunzawm theih chuan Switzerland lakah pawh chak tura rinkai zawk an ni ang.

Italy coach Luciano Spalletti chuan, "Croatia laka kan rilru put hmang kha a ṭha thlawt a, chutihrualin hmasawnna tur lai pawh kan ngah. A chang chuan chak duh lutuk vangin tihsual te kan nei ṭhin. Euro C'ship-a tawnhriat nei ṭha player kan ngah bik lo," tiin tawnhriat an ngah tawk lo thu a sawi.

Tun ṭumah hian an champion ṭuma player pawimawh Leonardo Bonucci, Giorgio Chiellini, Emerson Palmieri, Lorenzo Insigne leh Ciro Immobile te an tel tawh lo a; chutihrualin Donnarumma, Di Lorenzo, Jorginho, Nicolò Barella leh Federico Chiesa te an la awm tih hriat a ṭha.

Inlan tura beiseite

Italy: Donnarumma; Darmian, Mancini, Bastoni; Di Lorenzo, Barella, Jorginho, Cristante, Dimarco; Scamacca, Chiesa

Hrem: Calafiori

Switzerland: Sommer; Schär, Akanji, Rodríguez; Stergiou, Xhaka, Freuler, Aebischer; Ndoye, Embolo, Vargas

Hrem: Widmer