Spain hmaah beiseina neitu Georgia
Nilaini zan khan Georgia chuan team ṭha Portugal an barakhaih a, 2-0 in an hneh - an ram chanchina major tournament an khelh hmasak berah round of 16 an lut nghal a, mumang ramah an cheng.
Georgia thiampuipa Khvicha Kvaratskhelia chuan, "Tbilisi (an ram khawpui) chu eng ang takin nge a awm ang tih hi ka hmuh châk chu a ni," a ti thlawt a, hei hian an tana he inelna hlutzia hi a hrilhfiah.
Mahse, chu mumang ram duhawm bik aṭang chuan kaihharh châk em emin, tun tournament-a team ṭha ber ang hiala chhal ngam Spain chuan an lo hmuak dawn - Pathianni zan dar 12:30-ah quarterfinal luh an inchuh dawn.
France international hlui Willy Sagnol enkawl Georgia hi squad en mai chuan, Spain tan, "Fixture awlsam," tia sawi a awlsam mai thei. Mahse, he team hian inrintawkna nen inelna an hmachhawn miau avangin zuam sual theih an ni - Spain ṭantute inring rawh u le!
Spain an ṭha
Tournament ṭan hma khan Spain hi champion rin hlawh ber an ni kher lo mai thei a, mahse, inelna ṭan a nih meuh chuan anni aia team ṭha an awm rih lo - France, England, Netherlands, Belgium leh Italy ten beisei an phak lo vek a, inelna thlengtu Germany pawhin an match hnuhnung berah Switzerland an inhnehtawkpui hram.
Hetiang boruak karah hian Spain erawh saipui kal lai ang maiin chelh din rual an ni lo a, group stage match tawp bera an B team ang hiala chhal theih an khelhtir chung pawhin nuamsain an chak - champion rim an nam.
La Roja hi 'group of death' a an awm chungin an chak vek. An match hmasa berah team ṭha Croatia chu 3-0 in, nuamsain an hneh a, Italy pawh inkhel thunun chungin, 1-0 in an hneh a, scoreline hian game dinhmun a hrilhfiah lo zawk tiin a sawi theih.
Spain boss Luis de la Fuente-a'n Albania lakah B team khelhtir mah se, 1-0 in awlsam takin an chak leh tho a, an tan thin han tiphutu a la awm rih lo! Mahse, chesual thei lo an ni tihna erawh a ni lo a, Georgia lakah fimkhur a ṭul.
Spain an fimkhur
De la Fuente chuan, "Georgia hi kan zah em em - tournament ṭha tak an hmang a, Portugal an hneh thei. Kan tawnhriat aṭangin hma an sawnzia kan hmu thei a, game tinah hmasawnna hmuh tur a awm," a ti a, an khingpui tur a dah hniam duh lo.
Mahse, thawnthu hlui keu let chuan Spain hian Georgia an ngam hle - match sarih an intawn tawhah vawi ruk an chak a, Georgia hian vawi khat hnehna an chang ve. Euro qualifier-ah khan group khatah an awm dun a, Tbilisi khawpuiah Spain hian 7-1 in hnehna an chang a, Valladolid-ah 3-1 in an chak leh bawk.
An intawn hmasak hian Álvaro Morata chuan hattrick a siam a, Nico Williams leh Lamine Yamal ten goal an khung ve bawk - player pathum hi Pathianni zanah pawh Spain tlarhma luah tur an ni leh dawn a, tun inelnaa tlarhma hmuhnawm ber ang hiala chhal theih an nih avangin Georgia tlarhnungin ven dan an ngaihtuah a ṭul ang.
Mahse, De la Fuente a ṭawng fimkhur reng tho a, Spanish coach chuan, "Quarterfinal lut turin kan theihna sang bera kan khelh a ṭul dawn. An khelh dan phung thlak mah se, an ngaihtuahna erawh a ngai reng a, player an inman chak em em bawk," a ti.
Spain vanneihna
Group of death-ah an awm a, mahse, Croatia leh Italy an hneh zawn hnuah Albania an tum a, Spain an vannei - a harsa pahnih an khel hmasa a, last 16 an luh tawh tho avangin match tawp berah player an insiksawi theih phah.
Spain hian an squad-a player 26 zinga 25 chu Euro 2024-ah hian an khelhtir vek tawh a, hei hian an squad chhah tawkzia a hrilhfiah - inlan lo awm chhun hi third choice goalkeeper Álex Remiro chiah a ni.
Zaninah De la Fuente-a'n a 'A' team te a khelhtir leh thei tawh dawn a, Unai Simon chuan si ban nghakin, Dani Carvajal, Robin Le Normand, Aymeric Laporte leh Marc Cucurella te tlarhnungah dingin, midfield-ah Pedri, Rodri leh Fabian Ruiz an awm leh ang.
De la Fuente chuan, "Kan fimkhur a ngai dawn. Portugal an hneh avangin an inringtawk sawt dawn a, Georgia hian an hlauthawng miah lo ang. Mahse, anmmahni ang thoin keini pawh kan result vangin kan inringtawk khawp mai," a ti a, Georgia hmachhawn turin a inpeih.
Sum leh hmingṭhatna!
Pathian thuin, sum tam tak aia hmingṭhatna thlang zawk turin min ti a, Georgia player-te chuan a pahnihin an nei kawp thei dawn.
Georgia Prime Minister hlui leh sumdawng hausa tawntaw Bidzina Ivanishvili chuan, an ram player leh coaching staff-te chu quarterfinal an lut a nih chuan pound maktaduai 8.4 a pek tur thu a sawi!
Kum 68 mi Ivanishvili hi bank, computer leh metal lama sumdawng niin, Forbes chuan a hausakna hi £3.87tld zet niin an tarlang. Kum 2012 khan Prime Minister lo ni tawhin, an ram rorel mektu Georgian Dream party dintu a ni a, April khan 'foreign agent' dan an pass chungchangah Georgian footballer-ten nasa takin an lo bei tawh.
Mahse, Euro last 16 an thlen meuh chuan an ram player-te tan Ivanishvili a inhuam thui hle - hei hian Georgian player-teah phur lehzualna a pe ang tih a chiang a, mahse, an hmachhawn tur hi Spain an nih miau avangin a awlsam dawn lo.
Beiseina neitu
Georgia tan goalkeeper Giorgi Mamardashvili chu player langsar a ni ṭhin a, Portugal laka a save zozaite kha theihnghilh a harsa - kum 23 mi keeper hi Spain laka an chak dawn chuan a chet ṭhat leh a ṭul ang.
Valencia keeper hi La Liga lam khel sa a nih avangin Spain team a hrechiang a, a hlau lo ang - Euro a chet ṭhat avangin Georgian keeper hian ngaihventu a nei nghal nual a, Valencia hian euro maktaduai 40 vel an chhiar nghal niin an sawi.
Napoli forward Khvicha Kvaratskhelia mawlh hi lam hmaih a thiang lo. Kum 23 mi player ngaihven hlawh hi Georgia beiseina kengtu ang hiala sawi theih a ni a, a chet ṭhat phawt chuan Georgia tan Spain lakah beiseina a awm dawn.
Euro 2024 ṭan hmaa sawi hlawh lem lo, ngaihven hlawh ta chu Georges Mikautadze a ni. French club Metz tana khel striker hian tun inelnaah goal thum khung tawhin top scorer a ni mek a, group stage match thumah goal a khung vek - goal hnih erawh penalty aṭanga lut a ni thung.