Bielsa enkawl Uruguay an kal fawr: A thlengtu USA dinhmun a chiang lo
Copa America 2024 khelh laiah Uruguay chu team hmuhnawm bik an ni mek a, coach ṭha Marcelo Bielsa naute hian nimin zing khan Bolivia chu 5-0 a sawp chungin quarterfinal lut turin an dinhmun a ṭha takzet tawh.
Inkhel dangah inelna thlengtu United States chu Panama lakah 2-1 in an chak lo a, match hnih an khelh tawhah point thum neiin Group C-ah pahnihna an ni mek, an group match tawp berah Uruguay an hmachhawn dawn avangin kawng a awlsam dawn lo.
Goal a sur
Marcelo Bielsa hi attacking football ngainatu a ni a, club lamah pawh Leeds United a enkawl laiin goal an nawr na thei hle a, a hnung lam ven phui aiin goal khung a tuipui hmasa ṭhin - Uruguay a khelh tur dan aṭang pawhin a ngaihdan hi a la thlak lo tih a lang.
MetLife Stadium-a inkhelah Uruguay hian a tir aṭanga a tawp thlengin, a khat mawi tawkin goal an khung a ni ber mai. Facundo Pellistri, Darwin Nunez, Maximiliano Araujo, Federico Valverde leh Rodrigo Bentancur ten goal khat ṭheuh an khung a ni.
Uruguay coach Bielsa chuan, "Uruguay hian player ṭha tak tak theihna nei sang tak tak a nei a, heng mite hi an ṭhat dan taka an khelh chhuah theihna turin hmasawn ngaihna lai kan la nei, tuna kan thlen chin hi a ṭha tawk kan ti a nih chuan a dik lo ang," a ti.
World number 14 Uruguay tan Liverpool striker Nunez a che ṭha thei hle a, ram tana match a khelh hnuhnung pariatah goal a khung vek. Tawnhriat nei ṭha Luis Suarez aiin Bielsa-a'n a ring zawk a, amah ringtu coach beiseina a tithlawn lo.
Copa America vawi 15 champion tawh hian quarterfinal lut turin point khat hmuh belh an la mamawh, an hmuh belh lo a nih pawhin midang inkhel result a zirin a thiam zual pariat zingah an tel phak dawn tho a, an dinhmun a ṭha tawh hle a ni.
USA an chak lo
Minute 18-naah Timothy Weah chu hnawhchhuah a ni a, player tlem zawk an nih hnuah United States hian Folarin Balogun hmangin goal an khung hmasa zawk a, hum tlang erawh a harsa.
Panama lamin Cesar Blackman hmanga an sut bakah Jose Fajardo chuan an goal hnihna a khung, hun tawp dawnah midfielder Adalberto Carrasquilla chu hnawhchhuah ni ve mah se result a tidanglam phak tawh lo.
USA forward Christian Pulisic chuan, "A kim loa khelh chu a harsa - Timothy Weah khan a tih dik loh a hria a, khatiang huna mahni team te player tlem zawk ni tura chhuahsan kha chu a fuh lo a ni, a insiamṭhat ngei pawh a rinawm," a ti.
Beisei an la neih thu sawiin US coach Gregg Berhalter chuan,"Thil thlen dan leh kan result hi lawmna tur chi a ni lo, sawisel erawhin awmzia a nei tawh lo thung. Tunah chuan thil thleng tawh theihnghilhin hma lam kan en tur a ni ang," tiin a sawi.
US hian hmahruaitu Uruguay an tum leh dawn a, tlang turin point an mamawh. Group match dangah tla chiang tawh Bolivia leh beisei la nei Panama te an inkhel thung dawn a, a tawp niah a tlang tur an chinfel dawn avangin a hmuhnawm ang.